Wuxendiki tajsiman wirustin ölgenlerning sani ashmaqta

Muxbirimiz eziz
2020-01-21
Élxet
Pikir
Share
Print

Xitayning wuxen shehiride yéngidin bayqalghan tajsiman yuqumluq wirusi nöwette pütün xitayni sarasimige sélish bilen birge, xitaygha qoshna döletlergimu tarqilip yéngi bir meydan dunyawi apettin bésharet bermektiken.

Xitay re'isi shi jinping 20-yanwar küni mexsus yolyoruq bérip "Yéngidin bayqalghan tajsiman wirusining tarqilishi heqqidiki xizmetni yüksek mes'uliyetchanliq bilen beja keltürüsh" ni tekitligen.

"Dewr" zhurnilining 21-yanwardiki xewiride éytilishiche, shu küni xitay döletlik sehiye saqliqni saqlash komitéti mezkur wirusning hazir xitaydiki bashqa sheherlerge tarqiliwatqanliqini, hazirghiche bu wirustin yuqumlinip ölgenlerning sani altige yetkenlikini bildürgen. Shundaqla bu wirusning hazir alliqachan teywen, jenubiy koréye, tayland we yaponiye qatarliq jaylargha tarqilip bolghanliqini muqimlashturghan.

Xelq'ara sehiye teshkilati 22-yanwar küni mexsus yighin chaqirip wuxendin tarqiliwatqan tajsiman wirus heqqide dunyawi agahlandurush tarqitishning zörür yaki emesliki heqqide qarar almaqchi boluwétiptu. Chünki xelq'aradiki nopuzluq bir qisim teshkilatlar xitay hökümitining yuqumlan'ghan kishilerning sani toghrisida emeliy ehwalni yoshuruwatqanliqini bayqighan. 16-Yanwar künila wuxen shehiride yuqumlan'ghanlar alliqachan 1700 ge yetken bolup, shu küni xitay hökümiti "Yuqumlan'ghan kishi 41 neper" dep jakarlighan.

Melum bolushiche, bu yéngi wirus adette wirus bilen yuqumlan'ghuchi kishining bashqilar bilen uchrishishi arqiliq tarqilidighan bolup, sars késilidin buyanqi yene bir qétimliq qorqunchluq yuqumluq késel hésablinidiken. Nöwette shimaliy koréye hökümiti bu wirusning tarqilishidin saqlinish üchün mushu charshenbe (22-yanwar) din bashlap chet'elliklerning chégradin kirishini men'i qilmaqchi iken.

21-Yanwar küni amérikidiki tajsiman wirus bilen yuqumlan'ghan tunji kishi washin'gton shtatida bayqalghan. Emma bu kishining xitaygha bérip yuqumlinip qalghanliqi yaki bashqa jaydin bu wirusni yuqturuwalghanliqi téxi éniq emes iken. Nöwette amérika ayrodromlirida xitaydin qaytip kelgen kishilerni mexsus tekshürüshtin ötküzüp, ularning tajsiman wirus bilen yuqumlan'ghan yaki yuqumlanmighanliqini éniqlash bashlan'ghan.

Toluq bet