Shi jinpingning “Wirusni nölge chüshürüshi” iqtisadiy sahege zor tesir körsetmekte

Muxbirimiz eziz
2022-04-19
Share

Xitayda yéngidin wehime peyda qiliwatqan tajsiman wirusigha taqabil turush üchün xitay re'isi shi jinping “Barliq charilerni qollinip yuqumni nölge chüshürüsh” tek yéngi istratégiyeni belgilep bergenidi. Yéqinda bu yolyoruq boyiche herqaysi jaylarda otturigha chiqqan qattiq qamal qilish charilirining mahiyette xitay iqtisadigha we xitay hakimiyitining mewjutluqigha éghir tehditlerni peyda qiliwatqanliqi köplep melum bolushqa bashlidi.

“Wal strét zhurnili” gézitining 18-apréldiki obzor maqaliside éytilishiche, xitayning 2022-yilliq 1-pesillik ishlepchiqirish we oborot sahesidiki éshish sür'iti shangxey, shénjén qatarliq jaylardiki qamal qilish chariliri hemde bu tüpeylidin kélip chiqqan selbiy aqiwetlerning éghir tesirige uchrighan. Buning bilen nöwette xitay hökümiti bu sahede kütken netijilerning birimu emelge ashmighan. Parche sétishmu mas halda izchil töwenlep mangghan. Chong sana'et bazilirining “Wirusni nölge chüshürüsh” üchün mejburiy taqilishi bolsa teminlesh zenjirlirining ‍üzülüp qélishini keltürüp chiqirish bilen birge meblegh salghuchilarnimu zor cheklimilerge duchar qilmaqtiken. Buning bilen dunyaning “Eng chong ishlepchiqirish zawuti” dep qariliwatqan xitayning iqtisadiy jehettiki éshishi her jehettin éghir tesirge uchrimaqta iken.

Obzorda éytilishiche, xitay hökümiti shi jinping otturigha qoyghan “Wirusni nölge chüshürüsh” chaqiriqigha esebiylerche egishiwatqan bolup, nöwette xitay kompartiyesining buni yéqin arida emeldin qalduridighanliqining héchqandaq béshariti yoq iken. Chünki shi jinping “Berdashliq bérishning özi ghelibe. Bizning wirusni nölge chüshürüsh tedbirimiz gherbning wirusqa qarshi turush chariliridin ming hesse ewzel” dep körsetken. Xitay kompartiyesining kaniyi bolghan “Xelq géziti” mu 17-apréldiki bash maqaliside “Hemme ish wirusni nölge chüshürüsh chaqiriqi boyiche dawam qilidu” déyilgen hemde shu arqiliq kompartiyening héchqachan xata ish qilmaydighanliqidin bésharet bergen.

“Yaponiye iqtisadiy xewerliri” (NIKKEI) ning 18-apréldiki obzor maqaliside bolsa xitay kompartiyesining buningdin yérim esir ilgiriki “Chong sekrep ilgirilesh” dolqunida iqtisadiy qanuniyetke pütünley xilap halda otturigha qoyulghan bir qatar siyasiy sho'arlirigha oxshap kétidighan bu chaqiriq “Pütünley siyasiylashqan yuqum tedbiri” dep körsitilgen. Bolupmu xitay kompartiyesining “Biz ijra qilghan yuqumni cheklesh tedbirliri sansiz hayatliqni qutulduruwaldi” dégen mezmundiki chaqiriqi 2022-yilining axiri échilidighan 20-qurultayda shi jinpingning yéngi re'islik orni mutleq muqimlashqan'gha qeder izchil dawam qilidighan bolghachqa bu sewebtin kélip chiqqan iqtisadiy chékinishning mahiyette xitay kompartiyesining hökümranliqigha éghir xiris peyda qilidighanliqimu alahide tekitlinidu.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet