Xitayda kelgüsi bir qanche ayda 800 milyon adem yéngi tipliq tajsiman wirus bilen yuqumlinishi mumkin

Nöwette, xitayda yéngi tipliq tajisi'an wirus misli körülüp baqmighan derijide shiddetlik kéngiyiwatqan bolup, xitay sehiye tarmaqliri kelgüsi bir qanche ayda 800 milyon ademning yuqumlinishi mumkinlikini bildürgen. Amérika döletlik ammiwi radi'iyosi NPR ning xewer qilishiche, bir qanche xil tekshürüsh shekilliri yérim milyon yaki uningdinmu köp ademning yuqumdin ölüshi mumkinlikini körsetmektiken. Ötken hepte xongkong tetqiqatchilirining élan qilghan bir doklatida, bir milyon'gha yéqin ademning ölüshi mumkinlikini ilgiri sürgen.

Döletlik ammiwi radiyosi NPR ning bildürüshiche, amérika yél uniwérsitétining yershari saghlamliq tetqiqatchisi shi chén, yéqinda xitay yuqumluq késelliklerni kontrol qilish merkizining diréktori lyang shawféngning ammiwi taratqular arqiliq “Tunji qétimliq kowid dolqunining emeliyette 60 pirsent etrapidiki kishilerni yuqumlanduridighanliqini élan qilghanliqini éytqan. Bu kelgüsi 90 kün ichide yersharidiki 10 pirsent ademning kowid wirusida yuqumlinidighanliqidin dérek béridiken.

NPR Ning éytishiche, xongkong uniwérsitéti yuqumluq késellikler we bi'o-statistika bölümining diréktori, proféssor bén kowling bu perezge qoshulidighanliqini bildürüp, bu wirusning xitayda herqandaq yuqum mezgilidikidin téz tarqiliwatqanliqi, bolupmu uning xitay puqralirida yuqum xaraktérlik boluwatqanliqini éytqan.

Xongkong taratqulirining éytishiche, nöwette xitayning béyjing qatarliq chong sheherliride yuqumdarlarning köplükidin doxturxana yétishmeslik, dora yétishmeslik, yuqumda ‍ölgenlerni köydürüshke jeset köydürüsh zawuti yétishmeslik ehwali kélip chiqqan. Lékin shundaqtimu Uyghur aptonom rayonluq sehiye tarmaqliri rayonda yéqinqi 3 kündin béri héchqandaq yuqumdar bayqalghanliqini ilgiri sürmekte.