Xitayda yiligha 100 milyon ademni toydurghili bolidighan yémeklik israp qilinidiken

Muxbirimiz jüme
2017-11-18
Élxet
Pikir
Share
Print

Xitayda 135 milyon ademning ozuqluq yétishmeslik hadisisige yoluqidighanliqi ilgiri sürülüwatqan bir peytte, xitayda yiligha 100 milyon ademni toydurghili bolidighan ashliq we yémek-ichmek israp qilinip tashliwétilidighanliqi xewer qilindi.

"Yémeklik közetchisi" namliq tor bétide xewer qilishiche, bu heqtiki sanliq melumatlar awstraliyege jaylashqan "Kelgüsi yölinishler xelq'araliq tetqiqat jem'iyiti" ning "Dunyawi su we yémek-ichmek krizisi tetqiqat programmisi" bu hepte élan qilghan doklatta otturigha qoyulghan. 

Xewerde körsitishiche, xitayda yiligha tashliwétilidighan yémek-ichmek 35 milyon tonna etrapida bolup, bu xitayning yilliq ashliq ishlep chiqirish miqdarning 6 pirsentige toghra kélidiken. 

Xewerde tetqiqat programmisi mudiri merwyn piyessening éytqanliridin neqil élip körsitishiche, u, xitayda israp qilinip tashliwétilidighan yémek-ichmeklerni bashqurush kücheytilip, israp qilish salmiqi azaytilsa, xitaydiki ozuqluq yétishmeklik mesilisini hel qiliqini bolidighanliqini bildürgen.

Xewerge qarighanda, israpchiliq hosul yighish, pishshiqlap ishlesh, bazargha sélish, parche sétish jeryanlirining hemmiside her xil shekil we her xil kölemde ortaq sadir bolidiken. 

Piyessening qarishiche, israp bolup tashlinip kétiwatqan yémekliklerning 19 pirsentini xitaydiki réstoranlar israp qilghan yémekler igileydiken. 

U, xitayda yémeklik israpchiliqining aldini alidighan bir ünümlük xizmet méxanizm berpa qilinishi lazimliqini tilghan alghanda Uyghurlarning yémek-ichmekke bolghan pozitsiyisi heqqide alahide toxtalghan. 

U, xitayda israp qilinip tashlinip kétiwatqan yémek-ichmek mesilisini hel qilish üchün yémek-ichmekke bolghan medeniyet pozitsiyisini özgertish kéreklikini, israpchiliqning xitaylargha qarighanda Uyghurlarda az ikenlikini otturigha qoyghan. 

Xewerge qarighanda, xitayda nöwette 135 milyon ademning qorsiqi toymaydiken. Shunga xitayda yüz bériwatqan israpchiliq hadisisi ünümlük tizginlense, bu, xitayning yémek-ichmek bixeterlikini kapaletke ige qilipla qalmastin, belki iqtisadiy we ékologiyilik muhitqimu payda élip kélidiken. 

"Jenubiy xitay seher pochtisi" bu yil maydiki bir parche xewiride xitayda yiligha 40 milyon tonna yémek-ichmek exliti chiqidighanliqini körsetken idi.

Toluq bet