Jéymis léybold: "Xitaydiki musulmanlar gulagini eyibleshning waqti boldi!"

Muxbirimiz eziz
2018-06-19
Élxet
Pikir
Share
Print

Yéqinqi mezgillerde xitay hökümitining Uyghur diyarida "Saqchi döliti" sheklidiki kontrolluq sistémisi berpa qilghanliqi hemde buninggha mas halda milyondin artuq Uyghurning qamaqqa élin'ghanliqi dunyadiki herqaysi axbarat wastilirida köplep xewer qilindi. Emma dunyaning bu heqte unche qattiq meydanda bolmaywatqanliqi kishilerning diqqitini qozghawatqanda xelq'arada tonulghan mutexessislerdin jéymis léybold bu mesile heqqide yene bir qétim qelem tewritip tashqi dunyaning bu mesile heqqide pikir qilish mejburiyitining barliqini tekitlidi.

Awstraliyediki latrobi uniwérsitétining proféssori, milletshunasliq saheside közge körün'gen alimlarning biri bolghan jéymis léybold 19-iyun küni élan qilghan bu heqtiki maqaliside Uyghur diyarida nöwette insan heqlirining depsende bolushidiki eng nachar rékort otturigha chiqiwatqanliqini, emma bu jayda zadi némilerning boluwatqanliqi heqqide dunyaning anche köp melumatliq emeslikini, bu ishlardin xewerdar bolghan sahelerningmu bu heqte söz qilishtin özlirini élip qéchiwatqanliqini bayan qildi shundaqla awstraliye hökümitini bu heqte xitay hökümitige bésim qilishqa chaqirdi. 

Proféssor léybold yene nöwette Uyghur diyarida "Terbiyilesh merkizi" namida mewjut boluwatqan, emma alliqachan "Gulag" sheklini alghan bu mu'essesilerning xitay asasiy qanunigha xilap halda Uyghurlarni basturush wasitisi boluwatqanliqini körsitidu shuningdek kanada we amérika hökümetliri xitay hökümitining bu xil qanunsiz qilmishlirini ashkara eyiblewatqanda awstraliye hökümitining tügülüwélish mewqeside boluwatqanliqini eyiblep, ularningmu heqqaniyet üchün kökrek kérip otturigha chiqish mejburiyiti barliqini eskertidu. Shuning bilen bir waqitta awstraliyediki kelgüsi ewladlarning Uyghurlar duch kéliwatqan xorluqlargha qandaq pozitsiyede bolghanliqigha qarap awstraliye hökümitige baha béridighanliqini ishare qilidu.

Toluq bet