Xitayning chet'ellerdiki Uyghur jama'itige parakendichilik sélishqa urunuwatqanliqi xewer qilindi

Muxbirimiz irade
2018-03-30
Élxet
Pikir
Share
Print

Amérikida chiqidighan "Iqtisadshunas" gézitide 28-mart küni, "Xitay chet'ellerde Uyghur dé'asporasining shekillinishini tosush üchün heriket qilmaqta" mawzuluq bir maqale élan qilindi. Maqalide kéyinki yillarda xitay hökümitining zulumidin qéchip nurghun Uyghurlarning chet'ellerge chiqip kétishke mejbur bolghanliqi shundaqla ularning chet'ellerdimu dawamliq türde xitay hökümitining ziyankeshlik qilishigha uchrawatqanliqi yorutup bérilgen.

Mezkur maqalida xitay hökümitining misir, tayland, wiyétnam qatarliq döletlerdiki Uyghurlarni mejburiy xitaygha qayturup ketkenliki, ularning bir qisimlirining "Térrorluq" bilen eyiblinip shu döletlerde türmilerde yétiwatqanliqidek pakitlar tilgha élinish bilen birge, amérikidiki sitimsin tetqiqat merkizining tetqiqatchisi yonsunning sözige asasen qayturup kétilgenler sanining ashkarilan'ghandin köp yuqiri bolushi mumkinliki otturigha qoyulghan. 

Aptor maqaliside chet'ellerde 1 yérim milyon etrapida Uyghur jama'iti bar bolsimu, emma ularning derdining tibetlerningkidek yaxshi anglitilmaywatqanliqini, xitay hökümitining bar küchi bilen buni yoqitishqa, hetta barche Uyghurni qayturup ekétish bedilige bolsimu, chet'ellerdiki Uyghur jama'itini jimiqturushqa urunuwatqanliqini eskertken.

Emma chet'ellerdiki Uyghur pa'aliyetchiler bügün buninggha qayturghan inkasida, xitay hökümitining bu xil urunushlirining netijisiz qalidighanliqini bildürdi. Dunya Uyghur qurultiyining bayanatchisi dilshat rishit, "Chet'ellerdiki Uyghur jama'iti alliqachan oyghinip, bir milliy iradining etrapida zich uyushup boldi," dédi. 

Yuqiriqi maqalide yene xitay hökümitining gherbiy-jenub we ottura asiyadiki chégra rayonlirida her ikki tereptin "Gumanliq" kishilerni melum qilidighan paylaqchilarni yallawatqanliqi, Uyghurlarni "Térrorluq" teshkilatlirigha qatnishish bilen eyiblep zerbe bériwatqanliqi qatarliq birmunche tepsilatlar bayan qilin'ghan.

Pikirler (0)
Share
Toluq bet