Xitay hökümitining "Sehiye yardimi" teshwiqati guman qozghimaqta

Muxbirimiz eziz
2019-08-27
Élxet
Pikir
Share
Print


Xitay hökümiti yéqinda arqimu-arqidin bayanat we doklatlar élan qilip, özlirining Uyghurlar diyaridiki "Saghlamliq we namratliqtin qutuldurush xizmiti" ning zor utuqlargha érishkenlikini teshwiq qilishqa kirishken.

Shinxu'a agéntliqining 26-awghusttiki xewiride éytilishiche, shu küni xitayning sehiye we saqliqni saqlash komitéti béyjingda muxbirlarni kütüwélish yighini chaqirghan. Yighinda Uyghur aptonom rayonluq sehiye we saqliqni saqlash komitétining mudiri mutellip rozi Uyghurlar diyarida bu yil awghustqa qeder késellik sewebidin namratliqqa giriptar bolghan 40 ming a'ililiktin 22 ming a'ililik namratliqtin xalas bolghanliqini, ötken mezgillerdiki "Késel körsitish qiyin bolush", shuningdek "Késel bolsimu dawalitalmasliq" halitini tügitish üchün bir qatar parawanliq we yardem siyasetlirining yolgha qoyulghanliqini sözligen.

Axbarat élan qilish yighinida mutellip rozi yene Uyghurlar diyaridiki kishilerning otturiche ömrining 1949-yilidin ilgiriki 30 yashtin 2018-yiligha kelgende 72 yashqa yetkenlikini, yene mushu mezgilde bowaqlarning ölüp kétish nisbiti we hamilidar ayallarning tughutta ölüp kétish nisbitining ghayet zor derijide töwenligenlikini, doxturxana we késel kariwatliri sanining hazir 1949-yilidikidin nechche yüz hesse ashqanliqini alahide tekitligen.

Xitay hökümitining Uyghurlar diyaridiki sehiye xizmiti saheside mushundaq "Ghayet zor tereqqiyat" qa érishkenliki heqqidiki teshwiqatliri köplep otturigha chiqiwatqanda Uyghur analizchilar buni "Nöwette xelq'arada barghanséri yuqiri pellige chiqiwatqan lagérlar heqqidiki chuqanlarni bésiqturush urunushining bir qismi" dep körsetti. D u q ning bayanatchisi dilshat réshit bu heqte söz qilip: "Xitay hökümitining sehiye jehette Uyghurlargha bek köp yardem qilduq, dégini pütünley yalghan. Milyonlighan ademni lagérlargha qamiwetken hökümet qaysi yüzi bilen Uyghurlarning saghlamliqini ashurghanliqini dawrang qiliwatidu?" dédi.

Halbuki, xitay hökümiti özlirining Uyghurlar diyaridiki sehiye ishlirigha ghayet zor meblegh we adem küchi serp qilghanliqini teshwiq qiliwatqanda ijtima'iy taratqulardin melum bolghan uchurlar lagérlargha qamalghan Uyghurlarning arisida ölüp kétiwatqanlarning éshiwatqanliqi, lagérdin chiqqanlarningmu ozuqluq yétishmeslik we éghir rohiy qiynaqlar destidin ölük bilen tirikning ariliqidiki erwahsiman insanlargha aylinip qéliwatqanliqini körsetmekte.

Toluq bet