Хитайға қарши наразилиқларниң күчийиватқанлиқи мәлум

Мухбиримиз ирадә
2018.01.11

Бүгүн ройтерз агентлиқи ню-йорктики бир истратегийә тәтқиқат мәркизиниң қурғучиси, тәтқиқатчи питер маринониң хитай һәққидики бир мулаһизисини елан қилинди. “хитайға болған қаршилиқниң күчийиш сәвәблири” дәп мавзу қоюлған бу мулаһизә мақалисидә хитай һөкүмитиниң йеқиндин буянқи бир қатар һәрикәтлириниң дуняда хитайға болған қаршилиқни күчәйтиватқанлиқи баян қилинған.

Униң мақалисидә баян қилишичә, йиллардин бери хитайниң хәлқаралиқ мәсилиләрдики “битәрәп турувелиш” яки “бәк алдирап ипадә билдүрмәслик” тәк позитсийәси униң җимҗит һалда тәрәққий қилип, иккинчи чоң иқтисадий күчкә айлинишиға ярдәм қилған. Кейинки бир қанчә йил ичидә хитайниң ташқи сияситидә чоң - чоң оюнларни ойниши вә күнсайин зомигәрлишиши җиддий диққәт қозғиған вә нәтиҗидә техи бир қанчә йил алдидила хитай мәблиғини вә хитайниң алақисини қарши еливатқан дөләтләр һазир өзгирип хитайға қарши һәрикәткә өткән.

У америка президенти доналд трампниң өткән ай елан қилған “дөләт бихәтәрлик истратегийәси” доклатида хитайни илгирикидин пәрқлиқ һалда “риқабәтчи” дөләт дәп елан қилиши шундақла австралийә, йеңи зеландийә һөкүмәтлириниң йеқинқи инкаслири вә һәтта әң йеқин иттипақдиши пакистан биләнму “бир бәлвағ бир йол қурулуши” рамкисидики бәзи ташйол қурулушлириниң тохтап қелиши қатарлиқларни мана бу наразилиқларниң дәсләпки ипадилири дәп көрсәткән.

У мулаһизә қилип, “нөвәттә хитай һөкүмитиниң хәлқараниң бу наразилиқлириға қандақ йосунда җавап қайтуридиғанлиқи, хитайниң бундин кейин қандақ бир дөләт болидиғанлиқи, униң дунядики йеңи ролиниң немә болидиғанлиқини ашкарилайду, дегән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.