Xitaygha qarshi naraziliqlarning küchiyiwatqanliqi melum

Muxbirimiz irade
2018.01.11

Bügün roytérz agéntliqi nyu-yorktiki bir istratégiye tetqiqat merkizining qurghuchisi, tetqiqatchi pitér marinoning xitay heqqidiki bir mulahizisini élan qilindi. “Xitaygha bolghan qarshiliqning küchiyish sewebliri” dep mawzu qoyulghan bu mulahize maqaliside xitay hökümitining yéqindin buyanqi bir qatar heriketlirining dunyada xitaygha bolghan qarshiliqni kücheytiwatqanliqi bayan qilin'ghan.

Uning maqaliside bayan qilishiche, yillardin béri xitayning xelq'araliq mesililerdiki “Biterep turuwélish” yaki “Bek aldirap ipade bildürmeslik” tek pozitsiyesi uning jimjit halda tereqqiy qilip, ikkinchi chong iqtisadiy küchke aylinishigha yardem qilghan. Kéyinki bir qanche yil ichide xitayning tashqi siyasitide chong - chong oyunlarni oynishi we künsayin zomigerlishishi jiddiy diqqet qozghighan we netijide téxi bir qanche yil aldidila xitay meblighini we xitayning alaqisini qarshi éliwatqan döletler hazir özgirip xitaygha qarshi heriketke ötken.

U amérika prézidénti donald trampning ötken ay élan qilghan “Dölet bixeterlik istratégiyesi” doklatida xitayni ilgirikidin perqliq halda “Riqabetchi” dölet dep élan qilishi shundaqla awstraliye, yéngi zélandiye hökümetlirining yéqinqi inkasliri we hetta eng yéqin ittipaqdishi pakistan bilenmu “Bir belwagh bir yol qurulushi” ramkisidiki bezi tashyol qurulushlirining toxtap qélishi qatarliqlarni mana bu naraziliqlarning deslepki ipadiliri dep körsetken.

U mulahize qilip, “Nöwette xitay hökümitining xelq'araning bu naraziliqlirigha qandaq yosunda jawap qayturidighanliqi, xitayning bundin kéyin qandaq bir dölet bolidighanliqi, uning dunyadiki yéngi rolining néme bolidighanliqini ashkarilaydu, dégen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.