Рабийә қадир ханим җаң чүншйәнниң өз мәғлубийитини йошуруш үчүн, мәсулийәтни башқиларға дөңгәп қоюватқанлиқини билдүрди

Мухбиримиз җүмә
2015-03-10
Елхәт
Пикир
Share
Принт

Уйғур елиға тәйинләнгән хитай рәһбири җаң чүншйән уйғур елиниңму «ирақ шам ислам дөлити» ниң тәсиригә учраватқанлиқини, у йәрдин қайтип кәлгән бир қисим кишиләрниң қолға илинғанлиқини билдүргәндин кейин, дуня уйғур қурултийи рәиси рабийә қадир ханим инкас қайтуруп, җаң чүншйәнниң өз мәғлубийитини йошуруш үчүн, мәсулийәтни башқиларға дөңгәп қоюватқанлиқини билдүрди.

9-Март җаң чүшән бейҗиңда чақириливатқан «икки қурултай» җәрянида мухбирларниң зияритини қобул қилип, даириләрниң сүрийәдә җәң қилип қайтип кәлгән бир қисим «шинҗаңлиқлар»ни қолға алғанлиқини, дело дәлилләнгүчә вәқәни ахбаратқа ашкарилимиғанлиқини билдүргән.

У, қолға елинғанларни «шинҗаңлиқлар» дәп атиған болсиму, буларниң милләт тәркиби вә сани һәққидә тохталмиған.

Илгири хитай ахбарати «ирақ-шам дөлити» қораллиқ күчлири арисида 300 нәпәр уйғурниңму җәң қиливатқанлиқини хәвәр қилған иди.

Җаң чүншйәнниң баянатиниң пакитсиз икәнликини билдүргән дуня уйғур қурултийи рәиси рабийә қадир ханим мундақ деди: әслидә бу үстидә тохтилишқа әрзимәйдиған бир пакит, чүнки пакитниң чинлиқида гуман бар. Дейилгини раст болса немә үчүн та бүгүнгичә бу әһвал хитай ахбаратида хәвәр қилинмайду? җаң чүншйән мухбирму, рәһбәрму? у немә үчүн, бу вәқәни хитай ахбаратиниң хәвәр қилишиға йол қоймайду, өзи оттуриға чиқип ашкарилайду? демәкки пакит ойдурулма яки бурмиланған.

У йәнә, җаң чүншйәнниң хитай һөкүмити вә бир қисим хитай пуқралирини үмидсизләндүргәнликини, униң «5-июл үрүмчи вәқәси» дин кейин келип чиққан миллий зиддийәтләрни һәл қилалмиғанлиқини билдүрди.

Рабийә қадир ханим йәнә хитайни шәрқий түркистан мәсилисини һәл қилиш үчүн сиясәт өзгәртишкә, әркин ахбарат вә әркин муназиригә йол беришкә чақирди.

Пикирләр (0)
Share
Толуқ бәт