Amérikaning xitaygha qoyghan iqtisadiy jaza tedbirliri 6-iyul küni ishqa kirishidu

Muxbirimiz irade
2018-07-05
Élxet
Pikir
Share
Print

Tramp hökümitining xitay mallirigha qoyghan 34 milyard dollar qimmitidiki chégra béji 6-iyul küni resmiy ishqa kirishidu. Xitay tashqi ishlar ministirliqi bügün élan qilghan bayanatida amérikini eyiblep, uning bu tedbirlirini dunya iqtisadigha ziyan salghanliq, dep körsetken.

Halbuki, amérika prézidénti tramp xitay hökümitining xelq'aradiki erkin tijaretning ewzellikliridin paydilinip turup, xitayning qollishi astidiki karxaniliri arqiliq xelq'ara tijarette adil bolmighan riqabet weziyiti shekillendürüwatqanliqini ilgiri sürgen. U yene xitay shérketliri amérika we gherb elliride erkin tijaret qa'idiliri boyiche bu döletlerning intayin muhim istratégiyilik ehmiyetke ige sahelirige meblegh salghan bolsimu, emma chet'el shérketlirining xitaydiki oxshash sahelerge kirishige yol qoymaywatqanliqi, chet'el shérketlirini téxnikilirini xitay bilen ortaqlishishqa mejburlap, ularning eqliy mülüklirini oghrilawatqanliqini qattiq eyiblep, bir qisim jaza tedbirlirini élan qilghan idi. 

Birleshme agéntliqining xewiridin qarighanda, jüme küni ishqa kirishidighan 34 milyard dollar qimmitidiki jaza tedbirliri xitaygha qoyulidighan tedbirlerning deslepki bir qismi iken. Tramp hökümiti eger xitay öch élish xaraktérlik tedbirlerni alsa yaki chet'el shérketlirini eqliy mülüklirini xitay bilen ortaqlishishqa mejburlashni dawam qilsa, xitay mallirigha qoyulidighan jaza tedbirlirini 450 milyard dollargha qeder östüridighanliqini jakarlighan. 

Peyshenbe küni xitay tashqi ishlar ministirliqining bayanatchisi lu kang bu heqte uzun-uzun gep qilip, "Xitay amérikining bu tehditlirige boyun egmeydu. Xitay urush bashlighan birinchi kishi bolushni xalimaydu, biraq bizning menpe'etlirimiz ziyan'gha uchrighaniken, bizmu qarap turmaymiz," dégen. 

Xewerlerdin qarighanda, gerche xitay hökümiti amérikaning bésimlirigha berdashliq béreleydighanliqini jakarlisimu, emma xitaydiki öy-mülük sodisi we bashqa sahelerde alliqachan ziyan körülgen. Xitayning eng asasiy pay chek baziri körsetküchimu ötken aydin béri 12 pirsent chüshüp ketken. Bezi közetküchiler shi jinpingning amérikagha aldirap "Hürpiyip" qoyup, emdi ishni qandaq yighishturushini bilmey qéliwatqanliqini bildürgen idi.

Toluq bet