Amérikada 5 neper kishi xitay j x ministirliqi üchün xizmet qilish bilen eyiblendi

Muxbirimiz irade
2022.03.17
Share on WhatsApp
Share on WhatsApp

Amérika edliye tarmaqliri 5 kishini xitay jama'et xewpsizlik minsitirliqining buyruqi bilen heriket qilish, amérikada jasusluq qilish, parakendichilik tughdurush we iz qoghlash heriketliri bilen shughullinish jinayetliri bilen eyibligen. Nöwette ularning 3 nepiri qolgha élin'ghan.

Amérika edliye ministirliqi tarqatqan bu heqtiki doklatta, yoqiriqi xitay jasuslirining amérikaning nyu-york we bashqa jayliridiki “Xitay kommunist hökümitige qarshi” dep bilin'gen öktichi xitaylar, xongkongluqlar we hetta Uyghur hem tibetler üstidin jasusluq qilghanliqi we qilishqa urun'ghanliqi bayan qilin'ghan.

Bu besh kishi lin chiming (59), wang shujün (73), lyufen (62), mettow ziburis (49) we xitay puqrasi bolghan sun küyyang (40) qatarliqlar iken. Ular heqqide teyyarlan'ghan ayrim-ayrim 3 eyibnamige asaslan'ghanda, bu kishiler amérikaning nyu-york shehiridiki we bashqa shitatlardiki xitay kompartiyesige qarshi yaki xitay hökümiti yaxshi körmeydighan xitay öktichiler, Uyghurlar, tibet we xongkongluqlarni teqib qilish, uchur toplash, xitayning j x tarmaqlirigha uchur yetküzüsh, bednam chaplash, parakendichilik sélish we hetta suyqest pilanlashtek qilmishlar bilen shughullan'ghan.

Sot mehkimisining höjjitige qarighanda, jawabkarlar xitay xelq jumhuriyitide démokratiyeni berpa qilishni teshebbus qilghuchilarni yaki xitay yaxshi körmeydighan shexslerni nishanlap, xitayning dölet halqighan basturush pilanini yolgha qoyushqa maslashqan. Bu pilanlarning biride, ular 1989-yilidiki tyen'enmén oqughuchilar herikitining rehbiri bolghan, kéyin amérikagha kélip orunlashqan bir xitay öktichining amérika awam palata ezaliqigha namzat bolush pa'aliyetlirini buzushqa we saylamgha arilishishqa urun'ghan. Bu pilanlarning yene biride, jawabkarlardin üchi los-anzhélésta olturushluq bir xitay öktichi ressamning eserlirini yoqitishni pilanlighan hemde ressamning xizmet orni we mashinisigha közitish aparati ornatqan.

73 Yashliq wang shüjün bolsa uzun yil nyu-yorkta yashighan bolup, démokratchi qiyapitige kiriwalghanliqtin kishilerning ishenchisige érishken. U buningdin paydilinip nurghun öktichiler bilen alaqe qilip ularning oy-xiyalliri, pa'aliyetliri we hetta pa'aliyetlerde sözlimekchi bolghan nutuqi qatarliq uchurlirigha érishken, uni xitay j x ministirliqi xadimlirigha yollap bergen. U yene Uyghur, tibet we mongghullarnimu teqib qilghan. U alaqe qilghan bir xongkongluq pa'aliyetchi xongkonggha qaytqandin kéyin, xitay teripidin qolgha élin'ghan.

Amérika edliye ministirliqi dölet xewpsizliki bölümining bash teptish yardemchisi matéw g. Olsén bu heqte qilghan sözide mundaq dégen: “Xitayning dölet halqighan basturush pilani amérika we dunyaning herqaysi jayliridiki kishilerge ziyan salidu. Ular amérikaning asasiy qimmet qarishigha zit, biz amérika qanunigha xilap bundaq heriketlerge yol qoymaymiz. Edliye ministirliqi amérikaliqlarning we amérikida yashash, ishlesh we oqushqa kelgenlerning hoquqini qoghdaydu. Biz her qandaq bir chet el hökümitining söz erkinlikimizge tosqunluq qilishigha, qanunlirimizning qoghdilishini ret qilishigha, shexslerning bixeterlikige yaki a'ilisining bixeterlikige tehdit sélishigha yol qoymaymiz.”

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.