Xitaygha biwasite sélin'ghan chet el meblighi nechche on yillardin buyanqi eng töwen nuqtigha chüshüp qalghan

Washin'gtondin muxbirimiz erkin teyyarlidi
2024.02.20

Xitay korona wirusi yuqumidin kéyin iqtisadni eslige keltürüshte qiyniliwatqan bir peytte, 2023-yili xitaygha biwasite sélin'ghan chet el meblighi 1990-yillardin buyanqi eng töwen sewiyege chüshüp qalghan.

“Maliye waqti” gézitining xewer qilishiche, xitay tashqi péréwot idarisi 18-féwral élan qilghan sanliq melumatida xitaygha ötken yili biwasite sélin'ghan chet el meblighining aldinqi yilqidin 82 pirsent azayghanliqini bildürgen. Xewerde, bu xitaygha biwasite sélin'ghan chet el meblighining 1990-yillardin buyanqi eng töwen nuqtigha chüshüp qélishi ikenliki qeyt qilinmaqta. Xitay tashqi péréwot idarisining sanliq melumatida, 2023-yili xitaygha biwasite sélin'ghan chet el meblighining 33 milyard dollar etrapida bolghanliqi bildürülgen.

Halbuki, “Maliye waqti” gézitining qeyt qilishiche, xitay tashqi péréwot idarisining ölchimi chet el meblighining éqishigha munasiwetlik téximu keng pa'aliyet da'irisini öz ichige alghanliqtin, bashqa biwasite meblegh sélish körsetküchlirige qarighanda téximu turaqsiz iken. Xitaygha sélin'ghan biwasite chet el meblighining tarixtin buyanqi eng töwen nuqtigha chüshüp qélishi, béyjing öy-mülük kirizisi, ichkiy istémalning ajizlishishi, meblegh salghuchilarning ishenchisini yoqitishi qatarliq mesililerge chare izdep, iqtisadning turghun halitini qayta janlandurushta qiyniliwatqan bir peytte otturigha chiqqan.

Xitay tashqi péréwot idarisining sanliq melumatida, 2023-yilning 4-peslide xitaygha sélin'ghan biwasite chet el meblighining köpiyish alamiti körülgenliki, 17 milyard 400 milyon dollar mebleghning bu mezgilde sélin'ghanliqi qeyt qilinmaqta. Gérmaniye iqtisad institutining doklatida tekitlinishiche, 2023-yili xitaygha biwasite meblegh salghuchilar ichide gérmaniye shirketliri aldinqi orunni igiligen. Ötken hepte gérmaniyening ximiye sana'et shirkiti BASF kishilik hoquq teshkilatlirining bésimida Uyghur diyaridin chékinidighanliqini élan qilghan. Oxshash bir waqitta wolkiswagén shirkitimu Uyghur diyaridiki soda pa'aliyitini oylishiwatqanliqini bildürgen idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.