Amérika kéngesh palatasi ezalirigha xitaygha qarshi qanun layihesi tüzüsh yolyoruqi bérilgen

Muxbirimiz jewlan
2021-02-24
Share

Roytérs agéntliqining 23-féwral bergen xewirige qarighanda, amérika kéngesh palatasi démokratlar partiyesi rehbiri chak shumér (Chuck Schumer) kéngesh palata ezalirigha xitayning tehditige qarshi qanun layihesi tüzüsh yolyoruqi bergen. Uning bildürüshiche, kéngesh palata ezaliri ikki partiyening xitaygha qarshi qattiq qol bolushtek prinsipi boyiche ish körüp, amérikining pen-téxnikidiki yétekchi ornini qoghdash we xitay bilen boluwatqan tengsiz sodigha zerbe bérish üchün tedbir élishi kérek iken.

Xewerde éytilishiche, chak shumér kéngesh palata ezalirigha, jümlidin dölet mejlisidiki her qaysi komitét ezalirigha hawale qilghan bu wezipe amérikaning muhim istratégiyelik nishani bolup, amérikaning 1000 milyard dollar ajritip, sün'iy eqil, kwantliq hésablash we yérim ötküzgüch qatarliq halqiliq téxnikilarni tereqqiy qildurup, bu riqabette xitayni meghlub qilish we amérikigha yéngi xizmet pursiti yaritish meqset qilinidiken.

Shuning bilen bir waqitta, xitaygha qarshi küchlük meydanda turuwatqan jumhuriyetchiler baydin hökümitige bésim qilip, uning tramp hökümitining siyasitide ching turup, xitay hökümitige qattiq qol bolushini telep qilghan. Baydin hökümiti xitayning siyasitige qaytidin qarap chiqiwatqanliqini bildürgen hemde xitaygha her xil usullar bilen qarshi turidighanliqigha wede bergen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet