Америка, японийә уруш парахотлири җәнубий деңизда филиппин қисимлириға қошулуп, хитайға күч көрсәткән

Вашингтондин мухбиримиз әркин тәйярлиди
2024.04.08

Америка, японийә, австралийә уруш парахотлири 7-апрел күни җәнубий деңизда филиппин қисимлириға қошулуп, хитайниң бу райондики филиппинға қарши елип бериватқан тәһдитлиригә қарита ортақ чарлаш елип беришқа башлиған.

Америка деңиз армийәси институти ториниң хәвәрлиридин мәлум болушичә, 7-апрел күни америка, японийә, австралийә вә филиппинниң 6 данә уруш парахоти билән 4 уруш айропилани җәнубий деңизда ортақ чарлаш һәрикитини башлиған. Бу төт дөләтниң ортақ чарлаш һәрикити хитайниң филиппин деңиз армийәсиниң райондики ‍арқа сәп тәминләш паалийәтлиригә иғвагәрчилик қилишиниң арқисидин башланғанлиқи қәйт қилинмақта. Буниң алдида америка ташқи ишлар министири билинкен хитайни униң җәнубий деңизда филиппин парахотлириға “қораллиқ” һуҗум қилиши, америка-филиппин ортақ мудапиә шәртнамисиниң һәрикәткә өтүшини кәлтүрүп чиқириши мумкинликини агаһландурғаниди.

Мәлум болушичә, йеқиндин бери хитайниң деңиз саһили чарлаш қисимлири вә деңиз қораллиқ әтрәтлири филиппин деңиз иқтисадий районлирида су насоси ишлитиш, қамал қилиш маневири елип бериш, йирақ мусапилик радийо долқунлири үскүниси орунлаштуруш, филиппин кемилирини соқуш қатарлиқ усулларни қоллинип, филиппинға қарита ‍иғвагәрчиликни барғанчә күчәйткән. Хитай ташқи ишлар министирлиқи филиппинға униң игилик һоқуқ даирисидики бир аралда муқим һәрбий ул әслиһәси қурушиға қарши рәсмий тәһдит селип, бу райондики “земин игилик һоқуқини қәтий қоғдайдиғанлиқи” ни илгири сүргәниди.

Мәлум болушичә, америка билән филиппинниң җәнубий деңиздики тунҗи ортақ чарлаш паалийити өткән йили 11-айда елип берилған болсиму, лекин 7-апрел елип берилған чарлаш көп дөләт қисимлириниң тунҗи қетимлиқ чарлаш һәрикити болған, шундақла буниңға японийә тунҗи қетим қатнашқан. “малийә вақти” гезитиниң билдүрүшичә, филиппин, японийә вә америка бу һәптиниң ахирлири вашингтонда өткүзидиған үч тәрәплик учришишида, бихәтәрлик һәмкарлиқини техиму күчәйтмәкчи икән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.