Aq saray emeldari prézidéntning xitaygha qarshi xelq'ara ittipaq qurushqa mayil ikenlikini bildürdi

Muxbirimiz erkin
2018-04-09
Élxet
Pikir
Share
Print

Amérika prézidénti trampning bash iqtisadi meslihetchisi düshenbe küni prézidéntning soda mesiliside xitaygha qarshi xelq'ara ittipaq qurushqa mayil ikenlikini bildürgen.

Roytérs agéntliqining xewer qilishiche, bu sözlerni aq saray döletlik iqtisadi kéngishining diréktori lariy kudlof amérika chnbch téléwiziye qanilining ziyaritini qobul qilip, bu heqtiki bir so'algha jawab bergende qilghan.

U, prézidént trampning xitay bilen bolghan soda mesiliside yawropa ittipaqi, yaponiye we bashqa döletlerning qollishigha érishishni oylishiwatamdu, dégen so'algha jawab bérip, "Prézidéntning ittipaq qurushqa mayilliqi bar.

U özining bu pikirini éniq ipadilep baqmidi. Lékin uning shundaq qilishqa mayilliqi bar" dégen.

Prézidént tramp yéqinda xitayning 60 milyard dollarliq éksport mehsulatigha tamozhna béji qoyup, uning amérika eqliy mülkini oghrilash qilmishlirini jazalaydighanliqini jakarlighan. Arqidinla u yene xitayning 100 milyard dollarliq éksport mehsulatigha tamozhna béji qoyushi mumkinlikini ilgiri sürgen. Lékin prézidént tramp yekshenbe küni ikki terepning otturisidiki soda ixtilapini söhbet arqiliq hel qilishi kérek, dep qaraydighanliqini bildürgen idi.

Roytérs agéntliqining xewer qilishiche, xitay tashqi ishlar ministirliqi düshenbe küni prézidént trampning sözige inkas qayturup, ikki terepning "Mewjut shara'itta" söhbet élip bérishi mumkin emeslikini ilgiri sürgen.

Xitay tashqi ishlar ministirliqi bayanatchisi géng shu'ang, amérikini eyiblep, amérika-xitay soda ixtilapini pütünley amérikining "Qutratquluq herikiti" peyda qilghanliqini tekitligen.

U, "Hazirqi shara'itta ikki terepning söhbet élip bérishi mumkin emes" dégen. Lékin prézidént tramp hökümitining ilgiri sürüshiche, xitay amérika shirketlirini téxnika ötünüp bérishke mejburlap, amérika karxanilirini milyardlarche dollarliq ziyan'gha uchritip kelgen.

Toluq bet