Amérika dölet mejliside xitaygha qandaq qarshi turush toghruluq siyasiy munaziriler kücheymektiken

Muxbirimiz jewlan
2021-06-29
Share

Xitay tehditining dawamliq küchiyishige egiship amérika dölet mejlisidiki siyasetchiler bu zor tehditke qarshi turushning texirsiz mesile ikenlikini tonup, uninggha ünümlük taqabil turushning yolliri heqqide izdenmektiken.

"Sodining ichki ehwali" (Business insider) torida élan qilin'ghan bir maqalide körsitilishiche, tramp dewridin kéyin amérikaliqlarning xitaygha bolghan qarishi özgergen, yeni amérikaliqlar özidin meghrurlinishni tashlap, xitayning tehditige hoshyar bolushqa bashlighan.

Amérika xelqidiki bu yüzlinish amérika dölet mejlisidimu eks etken bolup, jumhuriyetchiler bilen démokratlarning xitay tehditige birlikte taqabil turush meydanida tarixta az körülgen birlik, ittipaqliq shekillen'gen.

Amérika kéngesh palatasi yéqinda maqullighan istratégiyelik riqabet qanun layihesi (SCA) diki mezmunlarning köp qismi xitaygha munasiwetlik bolup, xitayning ighwagerchiliki we dunyani kontrol qilish gherizide élip bériwatqan kéngeymichilik herikitini tosush muhim nishan qilin'ghan, hetta bu sewebtin kelgüside xitay bilen toqunush yüz bérishi mumkinlikimu nezerge élin'ghan.

Amérika siyasetchiliri otturigha qoyghan pikir we tedbirler ichide eng közge körünerlik bolghini amérikaning teywen'ge qaratqan siyasitidiki tüp özgirish bolup, amérika gerche "Bir xitay" pirinsipigha emel qilidighanliqini éytip kéliwatqan bolsimu, bu qétimliq qanun layiheside "Teywenni xitaydin ayriwétish amérikaning muhim menpe'eti" déyilgen. Démek, bu qanun layihisi amérikaning 1979-yildin béri yolgha qoyup kéliwatqan, "Xitay bilen teywen munasiwitide xitaygha yol qoyush we öz'ara toqunushmasliq" siyasitini bikar qilidiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet