Gordon chang: "Xitay kompartiyesige 'qan bérish' ni toxtitish lazim!"

Muxbirimiz eziz
2021-06-30
Share

Amérika axbaratlirida da'im közge chéliqidighan musteqil analizchi gordon chang 29-iyun küni "Qowuqtash instituti" (Gatestone Institute) ning torida élan qilin'ghan obzor maqalisi arqiliq amérika bashchiliqidiki gherp döletlirining xitay kompartiyesige téximu qattiq qol bolushi lazimliqini, shuningdek xitay kompartiyesining Uyghur mejburiy emgiki qatarliq wastilar arqiliq "Qan shorash" hemde özini küchlendürishige süküt qilmasliqni alahide tekitligen.

Aptor "Tajisiman wirusini xitay hökümiti qesten tarqatqan" dégen qarishini yene bir qétim eskertip, bu wirus tüpeylidin 600 mingdin artuq amérika puqrasining hayatidin ayrilghanliqini, xitay hökümitining her yili az dégendimu yérim trillyon amérika dolliri qimmitidiki eqliy mülükni oghrilap kétiwatqanliqini, shuningdek xitay hökümitining ashkara halda "Amérikagha qarshi xelq urushi" teshwiqati qiliwatqanliqini otturigha qoyghan.

Aptorning qarishiche, nöwette xitayning iqtisadiy "Halsirap qéliwatqan" halette bolup, zor derijide amérika bazirigha tayinip qalmaqta iken. Yene kélip xitay hökümiti hazir zor derijide ékisport qilishqa muhtaj iken. Bundaq ehwalda amérika hökümiti Uyghurlarning mejburiy emgiki bedilige méngiwatqan teminat zenjirining amérika bazirigha singip kirishige qet'iy qarshi turushi, xitay hökümitining bu arqiliq özining halaketke yüzliniwatqan ajiz gewdisige "Qan toluqliwélishi" gha yol qoymasliqi lazim iken. Bolupmu Nike, Apple qatarliqlar wastilik halda Uyghurlarning mejburiy emgikidin paydiliniwatqan hemde buninggha xatime bérishni ret qiliwatqan ehwalda, amérika hökümiti jezmen buninggha qarshi téximu ünümlük charilerni tépip chiqishi lazim iken.

Aptor axirida xulase teriqiside "Xitay hökümiti amérika üchün shunche köp tehditlerni peyda qiliwatqanda, bu xil düshmenlikke taqabil turushning eng yaxshi charisi xitay bilen bolidighan soda alaqisini pütünley késip tashlash," dégen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet