500 Neper dangdar shexsning xitaygha qarshi birleshme mektupi isra'iliye tashqi ishlar ministirigha sunulghan

Muxbirimiz jewlan
2020-08-10
Élxet
Pikir
Share
Print

"Yérusalém pochtisi" torining xewer qilishiche, 500 neper sabiq parlamént ezasi, alimlar, sen'etkarlar we bashqa dangliq erbablar isra'iliye tashqi ishlar ministiri gabi eshkinazigha birleshme mektup sunup, xitayning kishilik hoquq depsendichilikige qarshi éniq meydanini bildürüshni telep qilghan.

Mezkur mektupta korona wirusi heqqide mundaq déyilgen: "Xitay kompartiyesi wirusni yoshurush siyasiti yürgüzüp, bu wirusning pütün dunyagha yamrap kétishini keltürüp chiqirip, insanlarning hayatigha, dunyagha, jümlidin isra'iliyening iqtisadigha éghir ziyan saldi. Xitay hökümiti özining menpe'etini dep pütün dunyagha xewp yetküzidighan hökümettur."

Xewerde éytilishiche, bu mektupni sunushqa isra'iliyediki falun'gung terepdarliri türtke bolghan bolghan iken. Mektuptimu xitay hökümitining falun'gungchilarni qandaq basturghanliqi, ularning ichki ezalirini qandaq sughurup alghanliqi dégendek jinayetler tilgha élin'ghan.

Mektupta isra'iliye hökümitige xitaben mundaq déyilgen: "Qorqunchluq qirghinchiliq ayaghlashqandin kéyin qurulghan hemde bundaq jinayet 'emdi qayta yüz bermeydu' dep jakarlighan isra'iliye döliti bügünki bu mesilide özining awazini yükseldürüshi kérek. Melum siyasiy we iqtisadiy menpe'etler tüpeylidin süküt saqlashni toghra chüshen'gili bolidu. Emma bizningche, her qandaq aliy menpe'etni dep yehudiylarning tarixiy mes'uliyitige sel qarashqa bolmaydu."

Mektupta xitay bilen hemkarlishishning paydisidin ziyini köp ikenliki, shunga isra'iliyening meydanini choqum ochuq qilishi kérekliki bildürülgen.

Toluq bet