Herqaysi döletlerning 60 tek parlamént ezasi washin'gtonda xitaygha qandaq taqabil turushni muzakire qildi

Shimali amérika, asiya, afriqa, yawropa we latin amérikasidiki döletlerning xelq'ara parlaméntlar ara ittipaqigha eza 60 tek parlamént ezasi we siyasiyoni 13-séntebir washin'gtonda yighilip, xitayning xelq'ara qanuniy tertipke peyda qiliwatqan xirisigha qandaq taqabil turushni, bolupmu xelq'ara teminlesh zenjirini xitayning Uyghur mejburiy emgek mehsulatliridin qandaq tazilashni muzakire qilishqa bashlighan. Amérika jumhuriyetchi kéngesh palata ezasi marko rubiyo bilen kéngesh palata ezasi, démokrat bab menendezning sahibxanliqi, qoshumche amérika jumhuriyetchiler institutining orunlashturushida chaqirilghan bu yighinning échilishi munasiwiti bilen ötküzülgen axbarat yighinida, amérika kéngesh palata ezasi marko ru'ibyo, xitayning xelq'ara tertipke xiris qiliwatqanliqini bildürgen.

Marko rubiyo mundaq dégen: “Eger dunyadiki eng qudretlik tesiri bar küch xitay bolup qalsa, dunya qandaq jaygha aylinip qalidu? xitay öz xelqining erkinliki bilen kari yoq, prinsip we qanun bilen bashqurush dégenlerge perwayi pelek. U dunyaning barliq asasi qanun we ölchemlirige buzghunchiliq qilishni oylaydu”.

Yighinda kéngesh palata ezasi bab menendez: “21-Esirde biz milyonlighan Uyghurning jaza lagérlirigha solinishini körimiz, dep kim oylighan? xitay xelq'ara tertipke xiris qilmaqta. Xitay jenubiy déngizgha qoshun kirgüzüp, teywen'ge tehdit salmaqta” dégen.

En'gliye parlamént ezasi héléna kénidi bolsa, “Eger biz téximu yaxshiraq bir kélechekni arzu qilsaq, undaqta biz birlishishimiz hem bu ishta hemkarlishishimiz kérek” dep körsetken.

Melum bolushiche, axbarat yighinigha marko rubiyo, bab menendez, barone héléna kénidi bilen birge, bélgiye parlaménti ezasi kogolati, yawropa parlamént ezasi mériyam léksman, yaponiye parlaménti ezasi yasu'é funayama, ukra'ina parlaménti ezasi aléksandir mérézhko, awstraliye parlaménti ezasi pétir xalil, fiji parlaménti ezasi lénora, teywen parlaménti ezasi fan yong qatarliqlar qatnashqan.