5 Dölet istixbarat orgini xitaygha qarshi hemkarliqni kücheytken

Muxbirimiz irade
2018-10-12
Share

Roytérs agéntliqining igilishiche, istixbarat uchurlirini almashturushta öz'ara hemkarliship kelgen 5 dölet bu yilning béshidin bashlap xitaygha taqabil turush jehettiki hemkarliqini kücheytken.

Amérika, awstraliye, en'gliye, kanada, yéngi zélandiye qatarliq 5 dölet xitayning xelq'arada élip bériwatqan pa'aliyetliri heqqidiki istixbarat uchurlirini ortaqlishishni kücheytish bilen birge yene, bu mesilide gérmaniye we yaponiye bilenmu hemkarlashmaqtiken.

Roytérs agéntliqi buni, xitayning tesir körsitish herikiti we meblighige qarshi shekillen'gen xelq'ara frontning barghanséri zoriyiwatqanliqining ipadisi, dep körsetken.

Xewerde éytilishiche, bu uchur yuqiridiki dölet hökümetliride ishleydighan 7 neper hökümet xadimi teripidin delillen'gen. Ular mesilining sezgürlüki seweblik ismini ashkarilimay turup bergen uchurida xitay hökümitining öz istratégiyelirini ishqa ashurushtiki chékidin ashqan pozitsiyesige taqabil turush üchün hazir ortaq köz qarashqa ige döletlerning istixbarat hemkarliqini kücheytip, pat-pat uchriship turuwatqanliqini éytqan.

Melum bolushiche, amérika prézidénti donald tramp hökümitidiki alaqidar xadimlar nöwette bir qisim oxshash köz qarashliq döletler bilen xitaygha ortaq taqabil turush üchün arqa septe jiddiy xizmet qilmaqtiken. Bu heqtiki uchrishishlargha yuqiridiki döletlerning diplomatliri, istixbarat xadimliri we hökümet emeldarliri qatnishidiken. Mushu uchrishishlargha qatniship turuwatqan xadimlardin biri roytérsqa: "Biz yéngi bir dunyada yashawatimiz. Bu diktator dölettin kelgen tuyuqsiz chöchüsh bizni hemkarlishishqa ündidi" dégen.

Roytérsning qarishiche, xitay hökümiti tramp hökümitining "Aldi bilen amérika" deydighan sho'aridin bi'aram boluwatqan yawropa döletlirini özige tartishni arzu qilghan. Biraq yuqiridiki xewerler uning arzusining ré'alliqtin yiraqliqini körsitip béridiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet