Amérika kéngesh palatasigha chet'elning chégra halqighan parakendichilikige qarshi qanun layihesi sunuldi

Amérika kéngesh palatasigha chet'ellerning dölet halqighan basturush we parakendichilik heriketlirini tosush we bu xil heriketlerge qatnashqan shexs we hökümetlerni jawabkarliqqa tartish toghrisida qanun layihesi sunulghan. Melum bolushiche, “Dölet halqighan basturush siyasiti qanuni” namliq bu layiheni amérika kéngesh palatasining démokrat we jumhuriyetchi ezaliridin jéf markéléy, bén wardén, marku rubi'o, bén xagértiy qatarliqlar sun'ghan bolup, qanun layihesi amérikada yaki amérika puqralirigha qarita dölet halqighan basturush we parakendichilik heriketliride bolghan shexs hem hökümetlerni jawabkarliqqa tartishni meqset qilghaniken.

Mezkur qanun layihesi xitayning Uyghur aptonom rayonidiki yerlik bixeterlik organliri Uyghur amérika puqralirigha we amérikada yashaydighan Uyghurlargha ularning yurtidiki a'ile ezalirini görüge tutush, lagérlargha solash yaki qamaq jazasigha höküm qilish qatarliq wasitilerni qollinip, qorqutush, tehdit sélish bilen eyibliniwatqan bir waqitta sunulghan. Démokratik kéngesh palata ezasi jéf markéléy bu heqtiki bayanatida, “Bu qanun layihesi mustebit döletlerni jawabkarliqqa tartish we zulum salghuchi döletlerdin qachqanlarni bixeter panahgah bilen teminleshtiki intayin muhim heriket” dep körsetken.

Jumhuriyetchi kéngesh palata ezasi marko rubi'o mundaq dégen: “Shinjangdiki Uyghurlar xitay kompartiyesining dawamliq irqiy qirghinchiliqigha uchrawatqan bir peytte, Uyghur, tibet, falun'gongchilar, xristi'anlar we xongkong topliridin dölitimizge panahlinish üchün kelgen musapirlar, dölet halqighan basturushning nishanigha aylandi”.

“Amérika choqum bir istratégiyeni otturigha qoyup, bu jinayi taktikigha zerbe bérishi, xitay kompatiyesining amérika zéminidiki kishilerge parakendichilik salmasliqi we hujum qilmasliqigha kapaletlik qilishi kérek”.

Melum bolushiche, qanun layiheside prézidéntning dölet mejlisige chégra halqighan basturushqa qatnashqanliqi üchün jazalinidighan shexslerning tizimliki bilen teminlishi telep qilin'ghaniken.