Hillariy kilinton xanim awstraliyeni xitaygha boyun egmeslikke chaqirdi

Muxbirimiz irade
2018-05-10
Élxet
Pikir
Share
Print

Amérikining sabiq dölet ishliri ministiri hillariy kilinton xanim awstraliyeni xitaygha boyun egmeslikke chaqirdi.

Awstraliye birleshme agéntliqining xewirige qarighanda, hillariy xanim peyshenbe küni awstraliyediki bir yighinda söz qilip mundaq dégen: "Xitay özining awstraliyediki tesir küchini kücheytip, awstraliyeni özining tesir da'irisi astidiki döletke aylandurushqa heriket qiliwatqan bir shara'itta, awstraliye buninggha qet'iy boyun egmey, öz dölitining menpe'etlirini küchlük shekilde qoghdishi kérek."

Hillariy xanim yene mundaq dégen: "Siler hergiz buninggha yol qoymasliqinglar kérek. Chünki xitay tolimu yoshurun bir xewp. U démokratiyening asaslirini asta-asta yeydu we arida ishenchsizlik peyda qilidu. Eger siler bu yerde siyasetchilerni sétiwalidighan yaki bashqa rezil usullarni ishqa séliwatqan bir yoshurun qol bardek hés qiliwatqan bolsanglar, démek u xitayning démokratik bir jem'iyetni buzushqa bashlighanliqining bir ipadisidur. Bügünki künde awstraliyening öz milliy menpe'etlirini qoghdishi tolimu zörür."

Hillariy kilinton xanim yene amérikining asiya -tinch okyan rayonidiki herbiy mewjutluqini derhal kücheytip, awstraliye qatarliq tinch okyan döletliri bilen bolghan hemkarliqini ilgiri sürüshi we bu arqiliq xitaydin kélidighan tehditke ortaq taqabil turushi kéreklikini eskertken.

Yéqindin buyan amérika metbu'atlirida xitay heqqide nurghunlighan mulahiziler élan qilinmaqta. Bu mulahizilerde xitayning hazir amérika qatarliq démokratik ellerge qarshi heriket élip bérip, dunyani özgertishke uruwatqanliqi, shu sewebtin amérikining xitaygha qarita jiddiy tedbir élishi kérekliki eskertilmekte.

Toluq bet