Xitay da'iriliri xotendin 38 ming Uyghurning xitay ölkilirige ewetilgenlikini ashkarilidi

Muxbirimiz méhriban
2017-05-09
Élxet
Pikir
Share
Print

Xitay taratquliridin xoten géziti 9-may küni xewer bérip, xotende élip bérilghan éshincha emgek küchlirini xitay ölkiliride ishqa orunlashturush programmisigha yerlik Uyghurlardin 38 ming kishining teyyarlan'ghanliqini xewer qilip, bularning birqanche türkümge bölünüp yolgha chiqishqa bashlighanliqini ashkarilidi.

Xewerde yene, jenubiy Uyghur diyaridiki ishsizliq mesilisini hel qilish üchün qeshqer we xotenni merkez qilip, kelgüsi 3 yil ichide yerlik Uyghurlardin 100 ming kishini yötkep ishqa orunlashturush pilani emeliylishidighanliqi tilgha élin'ghan.

Xitay hökümet da'iriliri Uyghur yashlirini xitay ölke, sheherliridiki zawutlargha orunlashturushni 2004-yili bashlighan bolup, 2009-yilidiki "5-Iyul ürümchi naraziliq namayishi" gha shu yili 26-iyun xitayning gu'angdung ölkisi shawgüen oyunchuq zawutida yüz bergen Uyghur yashlirining xitay ishchiliri teripidin urup öltürülüsh, yarilandurulush weqesi seweb bolghan idi.

Xitay hökümiti Uyghur yashlirining xitay ölke, sheherlirige yötkilishini jenubiy Uyghur diyaridiki namratliqni yölesh, yézilarda éshincha emgek küchi bolup turuwatqan Uyghur yashlirini ish pursiti bilen teminlesh dep teshwiq qilmaqta. Emma chet'ellerdiki Uyghur teshkilatliri we xelq'ara kishilik hoquq teshkilatliri bu ehwalni, rayondiki Uyghur yashlirini öz yurtliridin ayriwétip xitay ölkilirige erzan emgek küchi qilip yötkesh, Uyghur diyaridiki yuqiri ma'ashliq ish pursetlirini xitay köchmenlirige bérish arqiliq Uyghurlarning öz zéminidiki nopusini shalanglashturush siyasiti dep tenqidlep kelmekte.

Toluq bet