Уйғур елидин хитай өлкилиригә йөткәп орунлаштурулған "ешинча әмгәк күчи" сани йәниму ашурулған

Мухбиримиз ирадә
2015-12-23
Share

Бу йил ичидә уйғур елидин хитай өлкилиригә йөткәп ишқа орунлаштурулған әмгәкчи сани 80 миң 700 кишигә йәткән. "тәңритағ" ториниң бу һәқтики хәвиридин қариғанда, уйғур ели даирилири уйғур елидики "ешинча әмгәк күчлири" ни ишқа орунлаштуруш үчүн өз җайида йеқин әтрапқа йөткәп ишқа орунлаштуруш вә тәшкиллик һалда хитай өлкә вә шәһәрлиригә йөткәп ишқа орунлаштуруш қатарлиқ тәдбирләрни қолланған.

Бу сиясәткә асасән өз җайида йөткәп ишқа орунлаштурулғанлар 40 миңдин ашқан. Хитай өлкилиригә йөткәлгән аз санлиқ милләт аммиси 80 миң 700 кишигә, пиланлиқ һалда хитай өлкилиридики карханиларға йөткәп орунлаштурулғанлар 15 миң 700 гә йәткән.

Уйғур елидин ешинча әмгәк күчи йөткәш мәсилиси чәтәлләрдики уйғур тәшкилатлири вә шундақла хәлқара кишилик һоқуқ органлириниң диққитини қозғап келиватқан бир мәсилә.

Хәлқара кишилик һоқуқ органлириму хитай һөкүмитини шавгүән вәқәсигә охшаш қанлиқ бир вәқәгә сәвәб болуп күчлүк наразилиқ пәйда қиливатқан бу сияситини аяғлаштурушқа чақирған иди.

Бирақ, хитай һөкүмити бу сияситини изчил һалда давамлаштурмақта. Тәңритағ ториниң ейтишичә, бу йил ичидә хитай өлкилиригә йөткәп орунлаштурулғанларниң сани өткән йилдикидин 128% көпәйгән. Һазирғичә уйғур елидин йөткәп ишқа орунлаштурулған аталмиш "артуқ әмгәкчи" 2 милйон 270 миң адәм қетимға йәткән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт