Xitay da'iriliri Uyghur yesli balilirining terbiyesini kontrol qilishqa meblegh sélishni köpeytti

Muxbirimiz erkin
2018.04.06

Uyghur aptonom rayoni jenubtiki oqush yéshigha toshmighan Uyghur balilirining mektepke kirishtin burunqi terbiyesini kontrol qilishqa meblegh sélishni yene köpeytken.

Shinxu'a agéntliqining 5‏-aprél ashkarilishiche, Uyghur aptonom rayonluq maliye nazariti qeshqer, xoten, aqsu, qizilsu qatarliq wilayet, oblastlardiki Uyghur we bashqa yerlik millet balilirining mektepke kirishtin burunqi 3 yilliq terbiyesige bu yil bir milyard 100 milyon yüen ajratqan.

Xitay hökümiti 2016‏-yil-10‏-aydin bashlap jenubtiki 3 wilayet, bir oblastni merkez qilip, Uyghur rayonidiki yéza-kentlerde balilarning mektepke kirishtin burunqi 3 yilliq heqsiz mejburiy ma'arip terbiyesini yolgha qoyghan. Lékin, bu yeslilerdiki oqutush tüzümi Uyghur ziyaliylirining, Uyghur ata-anilar we teshkilatlirining küchlük tenqidige uchrighan.

Ular bu heqsiz yeslilerning Uyghur balilirini assimilyatsiye qilishni meqset qilghanliqini ilgiri sürüp keldi. Bu yeslilerde Uyghurlarning tili, medeniyiti, tarixiy, diniy étiqadi, edebiyati, örp-adetlirige da'ir herqandaq ipade cheklen'gen bolup, balilarni omumyüzlük xitay tili, xitay medeniyiti, xitay örp-adetliri boyiche terbiyelesh yolgha qoyulghan idi.

Shinxu'a agéntliqining xewiride bayan qilishiche, Uyghur aptonom rayonluq maliye nazariti bu yilliq oqush yéshigha yetmigen balilar ma'aripi terbiyesige ajritilghan yuqiriqi pul yeslilerning heqsiz oqutush, tamaq, kitab puli, yeslilerning rémont, özgertish qurulushi we bashqa chiqimlirigha ishlitilidighanliqini bildürgen. Lékin, bezi közetküchiler, da'irilerning bu yilliq heqsiz yesli xirajitini köpeytishi, nurghun ata-anilarning “Yépiq terbiyelesh merkezliri” ge yighiwélinip, balilirining qaranchuqsiz qélishi bilen munasiwetlik ikenlikini bildürmekte.

Ularning ilgiri sürüshiche, da'iriler, nurghun yeslilerni yétip-qopidighan yeslilerge özgertip, qaranchuqsiz qalghan balilarni bu yeslilerde tutup turmaqta iken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.