Xitay da'iriliri Uyghur ösmürlirini changchile öginishke righbetlendürmekte

Muxbirimiz eziz
2018-04-10
Élxet
Pikir
Share
Print

Uyghurlar diyarida éghir zerbige uchrawatqan medeniyet saheside yéqindin buyan her derijilik da'irilerning mekteplerdiki yash‏-ösmürlerni xitay changchilisi, xitay milliy we wetenperwerliki mezmunidiki naxsha-muzikilarni öginishke righbetlendürüsh keng omumlashmaqta.

Melum bolushiche, xitay da'iriliri bu heriketni "Jungxu'a medeniyitining ésil en'enilirini öginish" dep perdazlimaqta iken.

Xitay hökümiti bashqurushidiki "Nur géziti" ning 10-apréldiki xewiride éytilishiche, nöwette béyjing tiyatiri, xitayche hösnxet, qeghez qiyish, qedimki xitay sazlirini chélish qatarliqlar ürümchi, aqsu, sanji, qeshqer qatarliq jaylardiki mekteplerde oquwatqan Uyghur oqughuchilargha ögitilmekte iken.

Aqsudiki bir bashlan'ghuch mektepning oqutquchisi xitay muxbirgha bu heqte söz qilip, "Balilar bularni öginish arqiliq jungxu'a medeniyitining ésil en'enisini hés qilip yételeydu" dégen.

Téxi yéqindila Uyghurlar diyaridiki bir qisim jaylarda "Jungxu'a medeniyitining klassik jewherlirini öginish" namida aq-qarinimu perq étish iqtidari bolmighan Uyghur ösmürlirige xitayning ikki ming yil burunqi taliplar pasonidiki xitayche kiyimlerni kiydürüsh, ulargha ichkiri xitayning özidimu alliqachan asar'etiqiler qatarigha kirip ketken nom-desturlarni yadlitish ewj alghan idi.

Xitay da'iriliri izchil türde Uyghur tilini ma'arip saheside cheklep we Uyghurlarning milliy tarixi hem medeniyitige xas barliq mezmunlarni hujum obyékti qiliwatqanda Uyghur ösmürlirini xitay medeniyitidiki tipik mezmunlarni öginishke righbetlendürüsh alaqidar közetküchilerning diqqitini qozghawatqanliqi melum.

Ular bu heqte pikir qilip, "Bashqa milletning medeniyet miraslirini öginish medeniyet bayliqini ashuridighan yaxshi usul. Emma bir milletni özige xas medeniyet en'enisini untup bashqa milletning medeniyitini özleshtürüshke yéteklesh sépi özidin medeniyet tajawuzchiliqi" dédi.

Toluq bet