Aqsuda "Xitay en'eniwi medeniyitini mekteplerge kirgüzüsh" herikiti bashlandi

Muxbirimiz gülchéhre
2017-05-02
Share

Xitayning Uyghur rayonidin tarqitidighan amanliq torining xewiridin ashkarilinishiche, 12-aprél aqsu sheherlik 2-bashlan'ghuch mektep oqughuchilirining ortaq xitay klassik shé'irini déklamatsiye qilishi, 4-bashlan'ghuch mektep oqughuchilirining 100 kishilik xitay yelpügüch usulini oynishi bilen, aqsu wilayitide "Junggo en'eniwi medeniyitini mekteplerge kirgüzüsh" témiliq mexsus pa'aliyitining bashlinish murasimi shundaqla tunji qedimi bashlan'ghan.

Wilayetlik partkom teshwiqat bölümi qatarliq orunlar birliship orunlashturghan bu heriket, yuqirining muhim siyaset orunlashturmilirigha maslashturup chiqarghan wetenperwerlik teshwiqat terbiye herikiti bolup, buningdin kéyin wilayet miqyasida bashlan'ghuch we ottura mekteplerde "Men jungxu'ani söyimen" témisidiki ikkinchi dersxana medeniyet-sen'et pa'aliyetliri arqiliq élip bérilidiken.

Da'iriler pa'aliyetke qatnashqan aqsu ikkinchi bashlan'ghuch mektep oqughuchilirigha "Bashlan'ghuch mektep oqughuchilirining yadlashqa tégishlik 75 klassik xitay shé'irliri", xitayche xushxet yézish meshiqi kitablirini tarqitip bergen.

Xewerde aqsu sheherlik 4-bashlan'ghuch mektep oqughuchisi elqut enwerning xitay klassik shé'irlirini we xushxet yézishni yaqturup qalghanliqi, ata, anisining tesiride xitay en'eniwi medeniyitige ishtiyaq baghlighanliqini misal qilip körsetken.

Buning aldida, da'iriler pütün rayondiki mekteplerde "Her bir Uyghur balining bir xitay dosti bolush, her bir xitay balining bir az sanliq millet dosti bolush" dégendek tüzümler bilen balilarni sün'iy dostluq ornitishqa mejburlighan idi.

Xitay da'iriliri atalmish qosh til ma'aripi islahatida nöwette barliq Uyghur mekteplirini xitay mektepliri bilen birleshtürüp bolghan, shundaqla qoshumche ders süpitide ötilidighan Uyghur til-edebiyati derslikidiki Uyghur kilassiklirinimu chiqirip tashlap, uning ornigha xitay klassik nemunilirining terjimisini kirgüzgen, shuning bilen bir waqitta, qosh til ma'aripini, emeliyette xitay tilidin ibaret bir tilda omumlashturuwatqan xitay ma'aripigha aylandurup qoyghan. Xitay da'irilirining xitay tili bilen teng, xitay medeniyitini singdürüsh qedimini kücheytip kéliwatqanliqi Uyghur ata-ana we ziyaliylarning endishisini kücheytiwatqanliqi melum.

Da'iriler yéqinda yene, Uyghur élida yesli ma'aripini xitaylashturushqa zor meblegh we küch ajratqandin sirt, Uyghur ösmürlerning bashlan'ghuch mektepke kirishtin burunqi 2 yilliq qosh til dep atalghan xitay tilliq yesli ma'aripini qobul qilish shertini 3 yilgha uzartqan idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.