Хотәндики әмәлдар вә мәмурларни җиддий түрдә хитайлаштуруш һәрикити диққәт қозғимақта

Мухбиримиз қутлан
2017-07-24
Share

Хотән вилайити һелиһәм уйғур дияри бойичә уйғурларниң нопустики үстүнлүки әң юқири болған вилайәтләрниң бири һесаблиниду.

Хотән вилайити җуғрапийәлик җайлишиш җәһәттин чәт вә йирақ район һесаблинидиғанлиқи, тәбиий иқлиминиң қурғақ, бостанлиқ көлиминиң тар, йәрлик мәдәнийитиниң наһайити қоюқ болғанлиқи шундақла сиясий җәһәттин әң сәзгүр район дәп қаралғанлиқи сәвәблик хитай һөкүмити көчмән хитай нопусини йәрләштүрүштә әң зор қийинчилиққа йолуқуватқан җай һесаблинидикән.

Шундақ болушиға қаримай, хитай даирилири нөвәттә хотән вилайитидики һөкүмәт системисида хизмәт қилидиған әмәлдарлар қатлими билән мәмурий хадимларниң нисбитини җиддий рәвиштә хитайлаштуруватқанлиқи мәлум болмақта.

"хотән гезити" ниң 23-июлдики бир хәвиригә қариғанда, хотән вилайәтлик партком тәшкилат бөлүми һөкүмәт системисида хизмәт қилидиған 42 нәпәр йеңи мәмурий хадим қобул қилған. Улар хотән вилайитиниң һәр дәриҗилик һөкүмәт органлирида катип, асасий қатлам кадири, малийә хадими, учур мулазимәт хадими вә ихтисас игиси сүпитидә хизмәткә қоюлидикән.

Хәвәрдә көрситилишичә, йеңидин қобул қилинип, йүзтуранә имтиһанға қатнаштурулидиған юқириқи 42 нәпәр намзатниң 40 нәпири хитай, пәқәт 2 нәпирила уйғур икән.

Көзәткүчиләрниң қаришичә, бу уйғурлар нопуси пүтүн вилайәт нопусиниң 90 пирсәнттин көпрәкини игиләйдиған хотән вилайитидә һөкүмәт мәмурлириниң пүтүнләй дегүдәк хитайлаштурулуватқанлиқиниң бир ипадиси икән.

Хотән вилайитиниң керийә, чира, нийә, лоп, хотән вә гума қатарлиқ җайлиридики муавин наһийә дәриҗиликтин юқири һөкүмәт әмәлдарлириму зор дәриҗидә хитайлаштурулған болуп, уйғур кадирларниң нисбити үчтин бир өлүшниму игилийәлмигән.

Хәлқарадики сиясий анализчилар, бу әһвал әмәлийәттә хитай өзи түзгән "миллий територийәлик аптономийә қануни" дики йәрлик кадирларниң нисбити һәққидики маддиларғиму пүтүнләй хилап келиду, дәп қаримақта.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт