Xotendiki emeldar we memurlarni jiddiy türde xitaylashturush herikiti diqqet qozghimaqta

Muxbirimiz qutlan
2017-07-24
Share

Xoten wilayiti hélihem Uyghur diyari boyiche Uyghurlarning nopustiki üstünlüki eng yuqiri bolghan wilayetlerning biri hésablinidu.

Xoten wilayiti jughrapiyelik jaylishish jehettin chet we yiraq rayon hésablinidighanliqi, tebi'iy iqlimining qurghaq, bostanliq kölimining tar, yerlik medeniyitining nahayiti qoyuq bolghanliqi shundaqla siyasiy jehettin eng sezgür rayon dep qaralghanliqi seweblik xitay hökümiti köchmen xitay nopusini yerleshtürüshte eng zor qiyinchiliqqa yoluquwatqan jay hésablinidiken.

Shundaq bolushigha qarimay, xitay da'iriliri nöwette xoten wilayitidiki hökümet sistémisida xizmet qilidighan emeldarlar qatlimi bilen memuriy xadimlarning nisbitini jiddiy rewishte xitaylashturuwatqanliqi melum bolmaqta.

"Xoten géziti" ning 23-iyuldiki bir xewirige qarighanda, xoten wilayetlik partkom teshkilat bölümi hökümet sistémisida xizmet qilidighan 42 neper yéngi memuriy xadim qobul qilghan. Ular xoten wilayitining her derijilik hökümet organlirida katip, asasiy qatlam kadiri, maliye xadimi, uchur mulazimet xadimi we ixtisas igisi süpitide xizmetke qoyulidiken.

Xewerde körsitilishiche, yéngidin qobul qilinip, yüzturane imtihan'gha qatnashturulidighan yuqiriqi 42 neper namzatning 40 nepiri xitay, peqet 2 nepirila Uyghur iken.

Közetküchilerning qarishiche, bu Uyghurlar nopusi pütün wilayet nopusining 90 pirsenttin köprekini igileydighan xoten wilayitide hökümet memurlirining pütünley dégüdek xitaylashturuluwatqanliqining bir ipadisi iken.

Xoten wilayitining kériye, chira, niye, lop, xoten we guma qatarliq jayliridiki mu'awin nahiye derijiliktin yuqiri hökümet emeldarlirimu zor derijide xitaylashturulghan bolup, Uyghur kadirlarning nisbiti üchtin bir ölüshnimu igiliyelmigen.

Xelq'aradiki siyasiy analizchilar, bu ehwal emeliyette xitay özi tüzgen "Milliy téritoriyelik aptonomiye qanuni" diki yerlik kadirlarning nisbiti heqqidiki maddilarghimu pütünley xilap kélidu, dep qarimaqta.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet