Хитай һөкүмити уйғур елиниң җәнубидики үч вилайәт бир областта хитай тили оқутушини күчәйтиш койида

Мухбиримиз ирадә
2020-09-10
Share

Хитай һөкүмити уйғур елиниң җәнубидики вилайәт-областларда хитай тили оқутушини күчәйтиш, җүмлидин хитай өлкилиридин йәниму көп хитай оқутқучи йөткәш үчүн мәхсус ярдәм мәблиғи аҗратқан.

"ақсу ахбарат тори" ниң бу һәқтики хәвиридин қариғанда, уйғур аптоном райони йил бешида ақсу вилайитигә чүшүрүп бәргән тәклиплик оқутқучиларниң 95 милйон 950 миң йүән мааш характерлик толуқлима ярдәм мәблиғи асасида, кейинки йерим йилдиму йәнә 95 милйон 950 миң йүән чүшүргән.

Хәвәрдә бу мәбләғниң мәқсити ениқ қилип: "җәнубий шинҗаңдики үч вилайәт, бир областниң өз алдиға оқутқучи тәклип қилиш хизмитини давамлиқ қоллаш, дөләт ортақ тил-йезиқи (хитай тили) оқутқучилири кәмчил болуш мәсилисини һәл қилиш" дәп көрсәткән.

Хитай даирилириниң ялғуз ақсу вилайитигә чүшүргән мәблиғиниң бунчә юқири болуши хитай даирилириниң җәнубта хитай тилини омумлаштуруш вә хитай оқутқучиларни йөткәшкә қаттиқ күчәватқанлиқидин дерәк беридикән.

Алдинқи күни "тәңритағ тори" бир хәвәр тарқитип, уйғур районида "алаһидә хизмәт орни пилани" бойичә 2019-йилғичә 99 миң 200 нәпәр оқутқучи тәклип қилинғанлиқини, буларниң ичидә 70 пирсәнтидин көпрәки йеза-қишлақлардики мәктәпләрдә ишләйдиғанлиқини вә нөвәттә 2020-йиллиқ оқутқучи тәклип қилиш хизмитиниң давамлишиватқанлиқини хәвәр қилған иди. Хәвәрдә йәнә тәклип қилинған оқутқучиларниң асасән дегүдәк хитай өлкилиридин кәлгән хитай оқутқучилар икәнлики мәлум болған иди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт