Xitay hökümiti Uyghur yéza balilirining xitay jingjü tiyatiri qatarliqlarni öginishige 17 milyon yüen meblegh salghan

Muxbirimiz irade
2020-10-22
Élxet
Pikir
Share
Print

Aqsu axbarat tori uchturpan nahiyesining imamlirim bazirida Uyghur balilirini xitay tili we medeniyiti boyiche terbiyeleshte bashchi bolup xitayning teqdirlishige érishken qurban niyazning bu yilmu memliketlik emgek nemunichisi bolup saylan'ghanliqi heqqide tarqatqan bir xewiride xitay merkizi hökümitining Uyghur yéza balilirigha xitayche medeniyet singdürüshke 17 milyon yüen meblegh salghanliqini ashkarilighan. Uningda munular déyilgen:

"2003-Yili, qurban niyaz 600 ming yüendin köprek meblegh ghemlep, yurti  uchturpan nahiyesining imamlirim bazirida dölet ortaq tili bashlan'ghuch mektipi qurghan. 17 Yildin buyan, u ma'arip arqiliq yurtining namrat, qalaq qiyapitini özgertken, bu mekteptiki balilarmu dölet ortaq til  yéziqini pishshiq igilep hem jungxu'aning munewwer en'eniwi medeniyitini yaxshi öginip, teqdirini özgertken. Bügünki künde, dölet medeniyiti bu yéza  kent bashlan'ghuch mektipining zörür derslikige aylandi. Dölet 17 milyon yüen meblegh sélip yéngidin qurghan siniplargha jungxu'a medeniyiti toghrisidiki resimlerni asti. 'xu'a mulen', 'xungdéngji', 'shajyabang'. . . Qatarliq xénen tiyatiri, béyjing tiyatirining kilassik böleklirini hemme oqughuchi éytalaydighan boldi".

Xewerde yene qurban niyazning sözi neqil keltürülup turup "Öginishni choqum balilardin bashlap tutishimiz kérek, kichik waqtida kallisida saqliwalghan nersiler bir ademning pütkül hayatigha tesir körsitidu. Shunga men balilarning kallisi eng sap waqtida sap nersilerni qobul qilghuzdum, herqaysi milletler bir a'ile kishiliri, biz jungxu'a milliti ortaq gewdisi éngini mustehkemlishimiz kérek" dégenler bayan qilin'ghan.

Xitay da'irilirining Uyghur élide xitay medeniyitini singdürüshni omumyüzlük kücheytiwatqan bolup, aqsu axbarat tori élan qilghan yene bir xewerdin qarighanda, aqsu wilayiti bilen xitayning jéjyang ölkisi yéqinda "Jéjyang  aqsu medeniyet almashturush, hemkarlishish" qurulushi deydighan bir heriket bashlighaniken. Xewerde bu heqte munular déiyilgen: "Men jéjyang, shinjangni söyimen témisidiki bu qurulush merkezning 3-nöwetlik shinjang xizmiti söhbet yighinining rohini emeliyleshtürüp, shinjangni medeniyet arqiliq ozuqlandurush qurulushini chongqur algha siljitishni meqset qilidu". Buningda aqsu bilen jéjyangning öz'ara medeniyet alaqilirini téximu kücheytish, yeni güzel sen'et, medeniyet yadikarliqliri, kutupxana, oyun qoyush, muzika qatarliq sahelerdiki 10 orun hemkarlishishi, jéjyang bilen aqsudiki her millet kadir-ammining keng alaqilishishi, omumyüzlük almashturushi qarar qilin'ghan. Melum bolushiche, hazir Uyghur ammisigha qarita xitay tili ögitish, xitay medeniyitini terghib qilish, hetta chaghan qatarliq xitay milliy bayrimini ötküzüsh, xitayche kiyinish, öylirige xitayche mesnewilerni ésish we bashqilar keng omumlashturuluwatqan bolup, aqsudiki xitay da'iriliri bu jehette eng aktip heriket qilmaqtiken.

Toluq bet