Хитайниң ақсудики партийә мәсули: “оқуш йешиға йәтмигән балилар хитай тили маарипини қобул қиливатиду”

Мухбиримиз әркин
2021-11-01
Share

Хитайниң ақсу вилайитидики партийә мәсули, оқуш йешиға йәтмигән балиларниң бирдәк хитай тили маарипида тәрбийәлиниватқанлиқини етирап қилған.

“ақсу гезити” ниң ашкарилишичә, ақсу вилайәтлик парткомниң муавин секритари җу линсен, бу учурни ақсуда қурулған “дөләт ортақ тилини кеңәйтиш базиси” ниң ечилиш мурасимида қилған сөзидә ейтқан. Хитай һөкүмити 2017-йили 7-айдин башлап уйғур тилини районниң маарип системисида рәсмий чәклигән болсиму, лекин у б д т вә һәр хил ахбарат йиғинлирида уйғур тилини қоғдаватқанлиқини тәкитләп кәлгән иди.

Хәвәрдә ейтилишичә, җу линсен ақсу вилайити “ши җинпиңниң тил-йезиқ хизмити тоғрисидики йолйоруқини чоңқур изчиллаштуруп, дөләт ортақ тил-йезиқини қәтий тәврәнмәй кеңәйтти вә омумлаштурди. Төт яштин алтә яшқичә болған оқуш йешиға йәтмигән балиларниң һәммиси дөләт ортақ тили маарипини қобул қилди” дегән. Униң ейтишичә, “һәр дәриҗилик вә түрлүк мәктәпләр җәнубий шинҗаң бойичә дөләт ортақ тил-йезиқи оқу-оқутуши билән омумиййүзлүк қаплашни башламчилиқ билән ишқа ашурған.”

У йәнә “дөләт ортақ тилини кеңәйтиш билән җоңхуа мунәввәр әнәниви мәдәнийитини тарқитишни бирләштүрүп, җоңхуа миллити ортақ гәвдиси еңини мустәһкәмләшкә пухта асас салғанлиқи” ни билдүргән.

Хитай һөкүмити 2017-йили башланған чоң тутқун билән бир вақитта уйғур тили, мәдәнийити, диний етиқади вә өр-адәтлирини “бөлгүнчилик” вә “ашқунлуқ” ниң ипадиси, дәп чәклигән иди. Мәлум болушичә, ақсу маарип иниститутида тәсис қилинған “дөләт ‍ортақ тили базиси” ниң оқутуш лайиһәси путоңхуа мәшқи, хитай классик әсәрлирини деклиматсийә қилиш қатарлиқ үч бөләккә бөлүнгән икән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт