Xitayning aqsudiki partiye mes'uli: "Oqush yéshigha yetmigen balilar xitay tili ma'aripini qobul qiliwatidu"

Muxbirimiz erkin
2021-11-01
Share

Xitayning aqsu wilayitidiki partiye mes'uli, oqush yéshigha yetmigen balilarning birdek xitay tili ma'aripida terbiyeliniwatqanliqini étirap qilghan.

"Aqsu géziti" ning ashkarilishiche, aqsu wilayetlik partkomning mu'awin sékritari ju linsén, bu uchurni aqsuda qurulghan "Dölet ortaq tilini kéngeytish bazisi" ning échilish murasimida qilghan sözide éytqan. Xitay hökümiti 2017-yili 7-aydin bashlap Uyghur tilini rayonning ma'arip sistémisida resmiy chekligen bolsimu, lékin u b d t we her xil axbarat yighinlirida Uyghur tilini qoghdawatqanliqini tekitlep kelgen idi.

Xewerde éytilishiche, ju linsén aqsu wilayiti "Shi jinpingning til-yéziq xizmiti toghrisidiki yolyoruqini chongqur izchillashturup, dölet ortaq til-yéziqini qet'iy tewrenmey kéngeytti we omumlashturdi. Töt yashtin alte yashqiche bolghan oqush yéshigha yetmigen balilarning hemmisi dölet ortaq tili ma'aripini qobul qildi" dégen. Uning éytishiche, "Her derijilik we türlük mektepler jenubiy shinjang boyiche dölet ortaq til-yéziqi oqu-oqutushi bilen omumiyyüzlük qaplashni bashlamchiliq bilen ishqa ashurghan."

U yene "Dölet ortaq tilini kéngeytish bilen jongxu'a munewwer en'eniwi medeniyitini tarqitishni birleshtürüp, jongxu'a milliti ortaq gewdisi éngini mustehkemleshke puxta asas salghanliqi" ni bildürgen.

Xitay hökümiti 2017-yili bashlan'ghan chong tutqun bilen bir waqitta Uyghur tili, medeniyiti, diniy étiqadi we ör-adetlirini "Bölgünchilik" we "Ashqunluq" ning ipadisi, dep chekligen idi. Melum bolushiche, aqsu ma'arip inistitutida tesis qilin'ghan "Dölet ‍ortaq tili bazisi" ning oqutush layihesi putongxu'a meshqi, xitay klassik eserlirini déklimatsiye qilish qatarliq üch bölekke bölün'gen iken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet