Йеңишәһәр наһийәсидә хитай тилини аилиләргичә омумлаштуруш давам қилмақта

Уйғурлар диярида уйғур тилиниң һәрқайси мәктәпләрдә чәклинишигә әгишип, нөвәттә бир қисим җайларда уйғур тилиниң уйғур аилилиридиму чәклинишкә учраватқанлиқи мәлум болмақта. Йеқинда қәшқәр вилайитигә қарашлиқ йеңишәһәр наһийәлик һөкүмәтниң тор бетидә елан қилинған “дөләт тилини өгинип вәтәнни сөйәйли” темисидики хәвәр мушу әһвални әкс-әттүриду.

Хәвәрдә ейтилишичә, 11-өктәбирдә наһийәлик маарип комитети сәпәрвәрлик йиғини ечип барлиқ оқутқучи вә оқуғучиларни “мәктәпләрдики оқутуш роһини аилиләргичә омумлаштуруш, шу арқилиқ һәр милләт аммисиниң дөләт тил-йезиқини өгиниш сәвийәсини ашуруш” қа чақирған.

Сәпәрвәрлик йиғинидин кейин һәрқайси башланғуч вә оттура мәктәпләр, шуниңдәк йәслиләр бирдәк “‛аиливи тәрбийә‚ ниң ролини толуқ җари қилдуридиғанлиқи, оқуғучи, оқутқучи вә ата-аниларниң дөләт тили сәвийәсини омумйүзлүк ашуридиғанлиқи” ни билдүргән. Шуниңға улапла һәммәйләнниң сиясий җәһәттики һәқ-наһәқ мәсилиләрни биливелиши, диний әсәбий идийәләрниң сиңип киришидин сақлиниши кәң тәшвиқ қилинған.

Хәвәрдә алаһидә қилип наһийәлик маарип комитетиниң “ата-аниларға мәктуп” намида очуқ хәт бастуруп тарқатқанлиқи тәкитлиниду. Мәзкур очуқ хәттә “дөләт тилини өгиниш вә вәтәнни сөйүш” паалийитини омумлаштуруш, шуниңдәк оқуғучиларниң ата-анилирини хитайчә өгинишкә, сөзләшкә вә қоллинишқа йетәкләш, шу арқилиқ “дөләт тил-йезиқини күндилик турмуш вә хизмәткә елип кириш” дәвәт қилиниду.

Алақидар мутәхәссисләр бу һәқтә пикир қилип, “бу хитай һөкүмитиниң уйғурларни ассимилятсийә қилиш урунушиниң йәниму бир балдақ йүксилиши,” дәп көрсәтти.