Xitay hökümiti “Bingtu'en” ni ziyaret qildurush üchün chet'eldiki xitay metbu'at xadimlirini élip kelgen

Muxbirimiz ümidwar
2017.11.05

Xitay kompartiyisining 19-qurultiyi yépilip, Uyghur diyarining pütün yéza-qishlaqlirighiche bolghan her sahe we her qatlamda shi jinping idiyisini öginish dolquni qozghitilish bilen bir waqitta xitay metbu'at-teshwiqat da'iriliri mexsus chet'ellerdiki bir qisim xitayche uchur agéntliqliri we metbu'at orunlirining muxbirlirini teshkillep, Uyghur diyaridiki xitay ishlepchiqirish qurulush armiyisining bir qanche déwiziyelirini ziyaret qildurghan.

“Xitay uchur tori” ning xewiridin melum bolushiche, amérika, kanada, firansiye, yaponiye qatarliq 16 dölettiki 18 xitay tilidiki metbu'at orginining bir qisim muxbirliri “Ishlep chiqirish qurulush armiyisi” ning 6-, 8-, 10-, 12-diwiziyelirini ziyaret qilip, “Ishlepchiqirish qurulush armiyisi” we ashu déwiziyeler jaylashqan jaylarning iqtisadi, medeniyiti, ma'arip we asasiy qurulushi qatarliqlardiki tereqqiyat ehwali bilen tonushqan.

Xewerde chet'ellerdiki mezkur xitay tilidiki metbu'at orunlirining tizimliki éniq éytilmighan. Emeliyette xitay Uyghur diyarini dunyadiki muhim xelq'araliq agéntliqlarning, metbu'atlarning muxbirliri we 

Zhurnalistlarning erkin ziyaret qilishi hemde agéntliqlarning muxbirlirining muqim turup, neq meydan xewerlirini bérishidin chette qaldurup kéliwatqan bolup, fransiyelik muxbir ursula gu'atér Uyghur diyarida ziyarette bolup, 2015-yilidiki bay weqesining heqiqiy ehwalini xewer qilghanliqi üchün chégradin qoghlap chiqirilghan, yekenning ilishqu yézisigha bérip, 2014-yilidiki ilishqu weqesige munasiwetlik uchurlarni toplighan kanadaliq bir muxbirining matériyalliri yighiwélin'ghan idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.