Хитайниң канададики өктичиләрни қорқутуш һәрикити һәққидики доклат канада һөкүмитигә йолланған

Мухбиримиз җүмә
2018-01-06
Елхәт
Пикир
Share
Принт

Хәлқара кәчүрүм тәшкилатиниң канада шөбиси қатарлиқ органлар хитайниң канададики уйғурларни өз ичигә алған кишилик паалийәтчилиригә қаритилған қорқутуш һәрикити һәққидә бир доклат тәйярлап канада һөкүмитигә йоллиған.

Канададин чиқидиған «милләт почта гезити» ( «натионал почтиси» ) ниң 5-январ хәвәр қилишичә, доклат мәзмуни қәтий мәхпий болуп, доклат бу йилниң бешида канада һөкүмитигә тапшурулған.

Доклатта хитай һөкүмәт хадимлириниң канададики сиясий вә кишилик һоқуқ паалийәтчилиригә қаратқан кәң көләмлик тәһдит селиш һәрикити тәпсилий баян қилинған. 

Доклатта хитай даирилириниң канададики паалийәтчиләр һәққидә интернет арқилиқ хата учур тарқитиш һәрикитидин башлап, уларға қаратқан биваситә тәһдитлири хатириләнгән. 

Хәвәрдә көрситишичә, доклатта йәнә хитай даирилири «5 хил зәһәр» дәп қарайдиған уйғурлар, тибәтләр, тәйвәнликләр вә фалунгоң муритлири йолуққан тәһдитләр мисаллар билән көрситилгән. 

Хәвәрдә хәлқара кәчүрүм тәшкилати канада шөбисиниң баш катипи алекс нәвениң ейтқанлиридин нәқил елишичә, паалийәтчиләргә қаритилған һуҗумлар унда-мунда йүз берип қалған һадисә әмәс икән.

У мундақ дегән: «бу тәһдитләрдә бир изчиллиқ бар. Бир чәтәл һөкүмитиниң канадада кишилик һоқуқниң улини актиплиқ билән колиши адәмниң көңлини ғәш қилидиған бир мисал.»

Хәвәрдә өз кимликини мәхпий тутқан бир хитай паалийәтчиниң ейтқанлиридин нәқил елип көрситишичә, у алдинқи йили хитайдики юртини зиярәт қилғанда хитай мәхпий хадимлири униң кәйнигә киривалған вә у канадаға қайтишида униңға тәһдит селип, бу ишларни ашкарилимаслиқни, өзи вә уруқ-туғқанлириниң бихәтәрликигә һези болуши керәкликини ейтқан.

Хитай даирилиниң йеқини йиллардин бери чәтәлләрдики уйғурларға һәр хил йоллар билән тәһдит селишни күчәйткәнлики мәлум.

Радиомизға зиярәт бәргүчиләр хитай һөкүмәт даирилири юртидики туғқанлирини гөрүгә еливелиш арқилиқ уларни хитайға қайтишқа, яки хитайға майил пикирләрдә болушқа қистиғанлиқини ашкарилиған иди.

Пикирләр (0)
Share
Толуқ бәт