Xitay hökümiti butanning doklam rayonida ul mu'essese qurulushi élip barghanliqini étirap qildi

19-Yanwar, yeni jüme küni xitay hökümiti doklam rayonida zor kölemlik ul mu'essese qurulushi élip barghanliqini étirap qilghan hemde bu qurulushning “Qanunluq” ikenlikini ilgiri sürgen.

Ötken yili yazdin buyan xitay bilen hindistan terep butanning doklam rayonida tesir da'ire taliship, uzun'gha sozulghan chégra majirasi qilishqan idi. Bu majira eng axirida xitay terepning doklam rayonida qurulush qilishni toxtitishi we ademlirini bu rayondin öz térritoriyesi ichige chékindürüp kétishi bilen tinjighan idi. 

Halbuki, yéqinda sün'iy hemrah arqiliq xitayning öz waqtida doklam rayonida ghayet zor herbiy gazarma qurulushi élip barghanliqi heqqidiki süret ashkara bolghan. Buning bilen hindistan terepning doklam rayonigha bolghan sezgürlüki yenimu kücheygen.

“Hindistan waqti géziti” ning 19-yanwardiki xewirige qarighanda, xitay tashqi ishlar ministirliqining bayanatchisi lu kang muxbirlarning doklam rayoni heqqidiki so'allirigha jawab bergende, “Sün'iy hemrahidin tartilghan bu süretni kimning teminligenlikidin xewirim yoq,” dégen.

Halbuki, u muxbirlargha munularni tekitligen: “Junggoning donglang (doklam) mesilisidiki pozitsiyisi nahayiti éniq. Bu rayon ezeldin junggogha tewe shundaqla junggo qanunlirining tesir da'iriside. Buni artuqche talash-tartish qilishning ehmiyiti yoq.”

Lu kang axirida xitayning doklam rayonida ul-mu'essese qurulushi élip barghanliqini étirap qilip mundaq dégen: “Junggoning bu jayda asasiy eslihe qurulushi élip bérishi chégra qoghdash qisimliri we bu yerde yashawatqan xelqler üchündur.”

Közetküchiler, xitayning emdila tinjighan doklam krizisi heqqide bu geplerni qilishi, uning hindistan terep bilen bolghan nazuk munasiwetlirige qaytidin ot tutashturidu, dep qarimaqta.

Buni bésish arqiliq, pikringizni yézing

• Print
• Hembehr
• Ewetish

Barliq pikir - bayanlarni körüsh.

• Bügünki anglitish
• Ilgiriki anglitishlar