Xitay kishilik hoquq doklati élan qilip amérikini eyibleshke urun'ghan

Muxbirimiz irade
2018-04-24
Élxet
Pikir
Share
Print

Xitayning kishilik hoquqni eng éghir depsende qilghuchi döletlerning biri ikenliki körsitilgen bir peytte, xitay da'iriliri öz aldighan bir kishilik hoquq doklati élan qilip, amérikining kishilik hoquq xatirisini eyibleshke urun'ghan.

Amérika dölet ishliri ministirliqi jüme küni élan qilghan 2017-yilliq kishilik hoquq doklatida, xitayni dunyada kishilik hoquqni eng éghir depsende qiliwatqan döletlerning biri, dep körsetken. Doklatta, Uyghur mesilisi köp yerde tilgha élin'ghan. Xitay hökümitining Uyghurlarning milliy, diniy we ana til hoquqini qattiq depsende qilip, "Xitaylashturush" siyasiti ijra qiliwatqanliqi bildürülgen.

Xitayning "Yer shari waqit géziti" amérikining kishilik hoquq doklatigha qarshi bash maqale élan qilip, amérikini qesten qusur izdesh we kishilik hoquqni siyasiylashturush bilen eyibligen hemde Uyghur élide kishilerning muqim we bextiyar yashawatqanliqini ilgiri sürgen.
Shinxu'a agéntliqining xewiridin qarighanda, xitay da'iriliri özidiki négizlik kishilik hoquq mesililirini ten élishning ornigha amérikigha qarishi bir doklat élan qilip, amérikining ötken bir yilliq kishilik hoquq xatirisidiki nuqsanlarni tépip chiqishqa, shu arqiliq amérikini tenqid qilishqa urun'ghan.

Xitayning dölet ishliri kabinéti élan qilghan doklatta ötken bir yil ichide amérikida bay-kembeghellik arisidiki perq téximu zoriyip, öy-makansiz kishilerning sani örligenliki, amérikining sehiye-sughurta xizmetlirining intayin nacharliqi ilgiri sürülgen. 

Emma doklatta, amérikida insanlarning eng eqelliy hoquqliri hésablinidighan pikir, din til-yéziq, uchur-alaqe, saylash-saylinish, teshkillinish-namayish qilish qatarliq erkinliklerning toluq kapaletke ige qilin'ghanliqi tilgha élinmighan.

Toluq bet