Xitay tajikistan'gha bir alyumin zawuti qurushni pilan qilghan

Muxbirimiz jüme
2017-11-18
Élxet
Pikir
Share
Print

Xitay da'iriliri Uyghur éli bilen chégrilinidighan tajikistan'gha zor miqdarda meblegh sélip, bir alyumin zawuti qurushni pilan qilghan.

Firansiye agéntliqining xewer qilishiche, 1 milyard 600 milyon dollar qimmitidiki meblegh tajikistan dölet igidarchiliqidiki "Talko alyumin shirkiti" ge sélinidiken. 

Mezkur zawutning qurulushini xitaydiki yünnen qurulush inzhénérliqi guruhi üstige alidiken. Qurulush tajikistanning gherbidiki tursunzade shehiride esli mewjut bolghan alyumin pishshiqlap ishlesh zawutigha yéqin bir jaygha yasilidiken. Bu zawutning yilliq ishlep chiqirish miqdari 500 ming tonna bolup zawut yene bir yérim yilda ishqa kirishtürülidiken. 

Xewerge qarighanda, nöwette tursunzade shehiride mewjut talko alyumin zawutining yilliq ishlepchiqirish miqdarimu 500 ming tonna bolup, emma tok yétishmeklik sewebidin zawut bu yilning aldinqi 9 éyida peqet 76 ming tonna alyumin ishlep chiqarghan. 

Xewerde körsitishiche yene, hökümet da'iriliri yéngi qurulidighan alyumin zawuti we nöwettiki tok yétishmeslik mesilisini hel qilish üchün bir su éliktur istansisi su tosmisi yasashqa bashlighan. 

Tosma qurulushi 2016-yili bashlan'ghan bolsimu, hökümet da'iriliri 4 milyard dollar kétidighan bu qurulushning meblegh mesilisini téxi toluq hel qilip bolalmighan. 

Tajikistan sabiq sowét ittipaqi jumhuriyetliridin biri bolup, hazirqi rusiye fédératsiyesi bu döletni özining tesir da'irisidiki bir rayon, dep qaraydiken. 

Barghanche yéqinlishiwatqan xitay tajikistan munasiwetlirining tajikistanning rusiye bilen bolghan munasiwetlirige qandaq tesir körsitidighanliqi, xitayning bu dölette künsayin küchiyiwatqan iqtisadiy mewjutluqigha rusiyening qandaq inkas qayturidighanliqi hazirche melum emes. 

Tajikistan Uyghur élining qeshqer wilayiti bilen chégrilinidu.

"Diplomat" torining xewer qilishiche, shu sewebtin xitay tajikistanning muqimliqi we xewpsizlikige alahide diqqet bilen qaraydiken.

Xewerde körsitishiche, xitay eger tajikistanda birer ichki qalaymiqanchiliq chiqip qalsa, bu tajikistan bilen qoshna bolghan Uyghur élige choqum tesir körsitidu, dep qaraydiken.

Toluq bet