Мутәхәссисләр: “хитайниң тәйвәнгә һуҗум қилғудәк һәрбий күчи йоқ! ”

Вашингтондин мухбиримиз әзиз тәйярлиди
2024.01.24

Йеқинқи мәзгилләрдә хәлқара саһәниң изчил диққитидә болуп кәлгән мәсилиләрниң бири тәйвән боғузи болуп, хитай һөкүмитиниң һәрқачан тәйвәнгә таҗавуз қилиш еһтималиниң барлиқи һәрқайси ахбарат васитилиридин кәң йәр елип кәлгәниди. Әмма йеқинда америка тәвәсидики 52 нәпәр һәрбий мутәхәссисни асас қилған бу һәқтики рай синашта “хитайниң тәйвәнгә һуҗум қилғудәк һәрбий қуввити йоқ” дегән хуласә оттуриға чиққан.

Рай синашта 27 пирсәнт киши хитайни су вә қуруқлуқтин оңушлуқ һалда тәйвәнгә һуҗум қилғудәк қуввәткә игә, дәп қарайдиғанлиқини билдүргән. Қалғанлар бирдәк “бу хил қуввәт мәвҗут әмәс” дегән. Мутләқ көп қисим мутәхәссисләрниң бу хил қарашқа майил болушидики сәвәб “навада хитай тәйвәнгә қораллиқ таҗавузни башлиса америка армийәси буниңға биваситә арилишиду” дегән чүшәнчә болған. Доклатта бу һәқтә “америка мутәхәссислириниң 95 пирсәнти ‛навада кәлгүси бәш йил ичидә хитай тәйвәнгә һуҗум қилсила америка җәзмән тәйвәнни һимайә қилишқа қол тиқиду‚ дәп қарайду” дейилиду. Шу қатарда тәйвәнлик 35 мутәхәссисму бу қетимлиқ рай синашқа яндин қатнашқан болуп, уларниң 17 пирсәнтила “хитайниң тәйвәнгә һуҗум қилғудәк һәрбий қуввити бар” дәп қариған.

Мутәхәссисләрниң мутләқ көп қисми “хитай биваситә һәрбий һуҗумға әмәс, бәлки тәйвәнни иқтисадий җәһәттин қамал қилишқа урунуши мумкин” дәп қариған. Уларниң пикричә хитай һөкүмити буниңға тамамән қадир икән. Шуниң билән биргә көпчилик тәйвәндики “демократик тәрәққият партийәси” ниң бу қетимқи сайламда йеңип чиқиши һәмдә йиллардин буян хитайға қарши мәйданини ипадиләп кәлгән лей чиңдениң ғәлибиси хитай билән тәйвән оттурисидики мунасивәтни техиму җиддийликкә гириптар қилиду, дәп қариған.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.