Xitayning Uyghur rayonidiki ghayet zor bixeterlik sélinmisi yuqiri téxnika shirketlirini zor paydigha érishtürgen

Muxbirimiz erkin
2018-06-27
Share

Xitayning Uyghur rayonini saqchi dölitige aylandurushi uning bixeterlik sélinmisining ziyade köpiyishini keltürüp chiqirip, xitay téxnika shirketlirini ghayet zor paydigha ige qilghan. Firansiye agéntliqining xewer qilishiche, Uyghur aptonom rayonining bixeterlik sélinmisi 2017 ‏-yili az kem bir hessidek artip, 58 milyard yüen'ge yétip barghan bolup, bu shu yili salametlik ishlirigha serp qilin'ghan pulning 2 hessisige toghra kélidiken.

Xewerde gérmaniyening tetqiqatchi adryan zénzning sözi neqil keltürülüp, "Mezkur rayonning 2017‏-yildiki ichki bixeterlik sélinmisi uning 2007‏-yildin 2012‏-yilghiche bolghan 6 yilliq omumiy bixeterlik sélinmisigha toghra kélidighanliqi" tekitlen'gen. Xewerde qeyt qilinishiche, bixeterlik sélinmisidiki bu zor artishni uning mezkur rayonda teqiblesh apparatlirini, "Terbiyilesh lagérliri" ni qurup, yüz tonush, köz tonush sistémisi, d n a ewrishkilirini yighishi, sün'iy eqil téxnikisini qollinip, rayondiki 20 nechche milyon xelqni qattiq teqib qilishi keltürüp chiqarghaniken. Xewerde xitay hökümitining yuqiriqi wasitilerni "Héchqandaq yochuq, héchqandaq ölük nuqta yaki boshluq" qoymasliq üchün qollan'ghanliqi bildürülgen. Xewerde bayan qilinishiche, buningdin xitayning xeykang téxnika shirkiti eng köp paydigha érishken. 

Xewerde, mezkur shirketning 2017‏-yili bir milyard 850 milyon dollarliq az dégende 5 xil qurulush toxtamigha érishkenliki, bu toxtamlarning mektep, meschit, ishxana, kocha we yighiwélish lagérlirigha közitish apparati we "Widiyoluq nazaret qilish sistémisi" orunlashturushqa alaqidar ikenlikini bildürülgen. Xewerde bayan qilinishiche, xeykang shirkiti 2017‏-yili qaraqash nahiyisining özidila 309 milyon yüenlik qurulush toxtamigha érishken bolup, qaraqash nahiyisi namrat nahiye bolsimu, lékin uning ötken yilqi bixeterlik sélinmisi aldinqi yilqidin 380 % artqan we bu uning yilliq kirimining 3 hessisige toghra kélidiken. Uyghur pa'aliyetchiler xelq'ara jem'iyetni Uyghur rayonidiki yighiwélish lagérlirining qurulushigha qatnishiwatqan xitay shirketlirige émbargo qoyup, ularni jazalashni telep qilip keldi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet