Xitay xongkongda "Tyen'enmin weqesi" ni qayta sadir qilmasliq heqqide agahlanduruldi

Muxbirimiz erkin
2019-08-16
Élxet
Pikir
Share
Print

Xitayning shinjén'gha esker toplawatqanliqi heqqidiki xewerler endishe qozghawatqan bir waqitta yuqiriqi derijilik bir amérika emeldari xitayni xongkongda "Tyen'enmin weqesi" ni qayta sadir qilmasliq heqqide agahlandurdi. Prézidént trampning dölet xewpsizlik bash meslihetchisi jon balton xitay hökümitining xongkongda namayishchilar bilen saqchilar otturisidiki toqunushni bahane qilip, namayishchilarni basturushigha qarshi ikenlikini bildürgen.

Jon balton 15‏-awghust "Amérika awazi" radi'osining ziyaritini qobul qilghanda bu agahlandurushni bergen. U, xitayning qedimini nahayiti éhtiyat bilen bésishi kérekliki, chünki, amérika xelqining tyen'enmin weqesini untup qalmighanliqini tekitligen. Jon balton bu sözlerni xitay hökümitining xongkonggha kirgüzüsh üchün shinjén'gha esker toplighanliqigha da'ir xewerler keng tarqalghan bir waqitta qildi. 

Buning sel aldida prézidént tramp xitayning xongkong etrapigha esker toplighanliqigha da'ir istixbarat uchurlirigha érishkenlikini bildürgenidi. Jon balton amérika xelqining tyen'enmin weqesini untup qalmighanliqini eskertip: "Ular qatar tizilghan tankilarning aldini tosighan ademning resimini untup qalmidi. . . . . . Ular erkinlik heykilini, xitay xelqining erkinlik, démokratiye telep qilish sadasini, xitay hökümitining 1989‏-yildiki basturushini untup qalmidi" dégen. 

Jon baltonning agahlandurushiche, "Xitay hökümitining xongkongda tyen'enmin weqesidek bir weqeni peyda qilishi nahayiti chong xataliq bolidiken." u, xitayning bundaq bir herikiti amérika dölet mejlisining shiddetlik inkasini qozghaydighanliqini agahlandurup, "Dölet mejliside keypiyat bek jiddiy, xitay hökümitining herqandaq xata qedimi dölet mejlisining partilishigha seweb bolidu" dégen. Lékin, xitayning en'gliyede turushluq bash elchisi lyu shawming peyshenbe küni bayanat élan qilip: xongkong weziyiti dawamliq yamanlashsa, béyjing hökümitining qarap turmaydighanliqi, "Béyjingning qalaymiqanchiliqni téz arida bésiqturushqa charisi we küchi barliqi" ni bildürgen.

Toluq bet