Gérmaniye bash ministiri mérkél "Xongkong puqralirining hoquqi we erkinlikige hörmet qilinishi" ni telep qildi

Muxbirimiz erkin
2019-09-06
Élxet
Pikir
Share
Print

Xitayda ziyarette boluwatqan gérmaniye bash ministiri an'géla mérkél 6‏-séntebir küni xitay bash ministiri li kéchyang bilen ötküzgen muxbirlarni kütüwélish yighinida, li kéchyang bilen kishilik hoquq, qanun bilen bashqurush we xongkong mesilisini sözleshkenlikini bildürüp, xitayni "Xongkong puqralirining hoquqi we erkinlikige hörmet qilish" qa ündigen. U, nöwettiki toqunushning zorluq küch arqiliq emes, di'alog arqiliq hel qilinishi kérekliki, shundaqla xitay-gérmaniye kishilik hoquq di'alogining pat arida qayta ötküzülüshini kütidighanliqini bildürgen.

Gérmaniye an'géla mérkélning ziyariti xitay hökümiti 2 milyondek Uyghur, qazaq we bashqa musulmanlarni yighiwélish lagérlirigha qamap, éghir kishilik hoquq krizisi yaratqan, shundaqla xongkongda namayish partlap, shiddetlik toqunushqa aylan'ghan nazuk bir mezgilde élip bérilghan. Uning ziyariti harpisida gérmaniyediki kishilik hoquq teshkilatliri bayanat élan qilip, uning ziyaritide lagérlar mesilisini otturigha qoyushi, lagérlarni derhal taqash, tutqunlarni qoyup bérish heqqide xitay rehberlirige bésim ishlitishini telep qilghan. Lékin gérmaniye taratqulirining xewerliride, uning bu nöwetlik ziyaritining asasliq küntertipi soda mesilisi ikenlikini, bu, uning lagérlar mesilisi, tibet we xongkong mesililirini otturigha qoyushigha kashila yaritidighanliqi ilgiri sürülgenidi. 

Mérkélning jüme küni "Xelq sariyi" da li kéchyang bilen körüshkende lagérlar mesilisini otturigha qoyghan-qoymighanliqi téxi bizge melum emes. Lékin, ili kéchyang bilen ötküzgen axbarat yighinida, xongkong mesilisini ashkara tilgha alghan. Uning ilgiri sürüshiche, "Bir dölette ikki xil tüzüm" we 1984‏-yili imzalan'ghan "Xitay-en'giliye qoshma axbarati" gha asasen xongkong puqralirining hoquqi we erkinlikini hörmet qilinishi kérek iken. Yighinda ili kéchyang "Bir dölette ikki xil tüzüm" ni qoghdaydighanliqi, emma xongkong hökümitining topilangni basturup, tertipni eslige keltürüshini qollaydighanliqini bildürgen. Bu an'géla mérkélning 12‏-qétim xitayni ziyaret qilishidur.

Toluq bet