Америка авам палатаси хоңкоң «демократийә қанун лайиһиси» ни мақуллиди

Мухбиримиз әркин
2019-10-16
Share

Америка авам палатаси 16‏-өктәбир күни аваз берип, хоңкоңдики демократийә тәрәпдарлириниң қоллишиға еришип кәлгән хоңкоңда демократийә вә әркинликни қоғдаш тоғрисидики қанун лайиһисини мақуллиған. Фирансийә агентлиқиниң хәвәр қилишичә, мәзкур қанун лайиһисиниң мақуллиниши хитайниң қаттиқ наразилиқини қозғиған. Нөвәттә, «хоңкоң кишилик һоқуқ демократийә қанун лайиһиси» кеңәш палатасиниң тәстиқидин өтүп, президент имза қойғандин кейин рәсмий күчкә игә болиду. Қанун лайиһисидә қәйт қилинишичә, америка ташқи ишлар министирлиқи һәр йили доклат тәйярлап, хоңкоң даирилириниң кишилик һоқуқ вә қанун билән башқурушқа әмәл қиливатқанлиқини тәмин әтмисә, хоңкоңниң америка билән болған алаһидә имтиязлиқ орни бикар қилинидикән.

Демократик авам палата әзаси бен рай луҗан чаршәнбә күни авам палатасида қилған сөзидә, «авам палатаси хоңкоң хәлқигә, ' биз демократийә вә адаләт үчүн биргә күришимиз‹ дегән күчлүк сигнал бәрди» дегән. 

Бу йил 6‏-айда авам палата әзаси кристофир симит тәрипидин оттуриға қоюлған мәзкур қанун лайиһиси 25‏-сентәбир күни авам палатаси ташқи ишлар комитетиниң бирдәк мақуллуқидин өтүп, авам палатасиға сунулған. Мәзкур қанун лайиһиси бу йил авам палатасиға сунулған хитайға алақидар бирқанчә муһим қанун лайиһәләрниң биридур. Буниң алдида «2019‏-уйғур кишилик һоқуқ сиясити қанун лайиһиси» оттуриға қоюлған. Мәзкур қанун лайиһисиниң кеңәш палатасида сунулған нусхиси йеқинда мақулланған. Әмма униң авам палатасида сунулған нусхиси һазирға қәдәр авазға қоюлмиған иди. Фирансийә агентлиқиниң хәвәр қилишичә америка авам палатасиниң қарари хитайниң қаттиқ наразилиқини қозғиған. Хитай ташқи ишлар министирлиқи баянатчиси гең шуаң американиң «қалаймиқанчилиқ чиқиришни тохтитиши» керәкликини тәкитләп, хитайниң хоңкоң қанун лайиһәсигә қарши «күчлүк тәдбир» алидиғанлиқини илгири сүргән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.