Amérika awam palatasi xongkong "Démokratiye qanun layihisi" ni maqullidi

Muxbirimiz erkin
2019-10-16
Élxet
Pikir
Share
Print

Amérika awam palatasi 16‏-öktebir küni awaz bérip, xongkongdiki démokratiye terepdarlirining qollishigha ériship kelgen xongkongda démokratiye we erkinlikni qoghdash toghrisidiki qanun layihisini maqullighan. Firansiye agéntliqining xewer qilishiche, mezkur qanun layihisining maqullinishi xitayning qattiq naraziliqini qozghighan. Nöwette, "Xongkong kishilik hoquq démokratiye qanun layihisi" kéngesh palatasining testiqidin ötüp, prézidént imza qoyghandin kéyin resmiy küchke ige bolidu. Qanun layihiside qeyt qilinishiche, amérika tashqi ishlar ministirliqi her yili doklat teyyarlap, xongkong da'irilirining kishilik hoquq we qanun bilen bashqurushqa emel qiliwatqanliqini temin etmise, xongkongning amérika bilen bolghan alahide imtiyazliq orni bikar qilinidiken.

Démokratik awam palata ezasi bén ray lujan charshenbe küni awam palatasida qilghan sözide, "Awam palatasi xongkong xelqige, ' biz démokratiye we adalet üchün birge kürishimiz' dégen küchlük signal berdi" dégen. 

Bu yil 6‏-ayda awam palata ezasi kristofir simit teripidin otturigha qoyulghan mezkur qanun layihisi 25‏-séntebir küni awam palatasi tashqi ishlar komitétining birdek maqulluqidin ötüp, awam palatasigha sunulghan. Mezkur qanun layihisi bu yil awam palatasigha sunulghan xitaygha alaqidar birqanche muhim qanun layihelerning biridur. Buning aldida "2019‏-Uyghur kishilik hoquq siyasiti qanun layihisi" otturigha qoyulghan. Mezkur qanun layihisining kéngesh palatasida sunulghan nusxisi yéqinda maqullan'ghan. Emma uning awam palatasida sunulghan nusxisi hazirgha qeder awazgha qoyulmighan idi. Firansiye agéntliqining xewer qilishiche amérika awam palatasining qarari xitayning qattiq naraziliqini qozghighan. Xitay tashqi ishlar ministirliqi bayanatchisi géng shu'ang amérikaning "Qalaymiqanchiliq chiqirishni toxtitishi" kéreklikini tekitlep, xitayning xongkong qanun layihesige qarshi "Küchlük tedbir" alidighanliqini ilgiri sürgen.

Toluq bet