Америка хитайни хоңкоңда муқимсизлиқ пәйда қилмаслиққа агаһландурди

Мухбиримиз әркин
2020-05-22
Share

Америка һөкүмити 21-май күни хитайни хоңкоңниң өз-өзини башқурушиға һөрмәт қилишқа чақирип, хитайниң мақуллимақчи болған дөләт хәвпсизлики қануни хоңкоңда еғир муқимсизлиқ пәйда қилидиғанлиқини билдүрди.

Америка ташқи ишлар министирлиқиниң баянатчиси морган ортагус 21-май күни елан қилған баянатида мундақ дегән: «хоңкоң хәлқиниң арзусини әкс-әттүрмигән һәрқандақ дөләт хәвпсизлики қануни еғир муқимсизлиқ пәйда қилиду шундақла америка вә хәлқара җамаәтниң күчлүк әйиблишигә учрайду.»

Морган ортагус ханимниң тәкитлишичә, хитайниң баянати вә униң қанун лайиһәси хитайниң 1997-йили хоңкоңни өткүзүвалғанда бәргән вәдилиригә хилап икән. Ортагус ханим хитай һөкүмитини 1984-йили имзаланған «әңилийә-хитай қошма ахбарати» да үстигә алған мәҗбурийәтлиригә әмәл қилишқа, хоңкоң хәлқиниң өз-өзини башқуруш арзуси, кишилик һоқуқи вә демократик һәқлиригә һөрмәт қилишқа чақирған. 21-Май күни йәнә президент трамп американиң бу қанунға күчлүк инкас қайтуридиғанлиқини билдүргән.

У мухбирларниң бу һәқтики соаллириға җаваб берип: «мән униң қандақ қанун икәнликини билмәймән. Һечким уни көрүп бақмиди. Әгәр у мақулланса биз униңға интайин күчлүк инкас қайтуримиз,» дегән. Нөвәттә мәзкур қанун лайиһәси уйғур, тибәт вә башқа кишилик һоқуқ тәшкилатлириниңму қаттиқ қаршилиқиға учриған. Дуня уйғур қурултийи 22-май баянат елан қилип, «хоңкоң хәлқиниң аптономийә, кишилик һоқуқ вә әркинликиниң уларниң көз алдида бузғунчилиққа учраватқанлиқи, әгәр тәдбир елинмиса хоңкоңниң шәрқий түркистан вә тибәт билән охшаш ақивәткә қалидиғанлиқи» ни билдүргән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.