Amérika xitayni xongkongda muqimsizliq peyda qilmasliqqa agahlandurdi

Muxbirimiz erkin
2020-05-22
Share

Amérika hökümiti 21-may küni xitayni xongkongning öz-özini bashqurushigha hörmet qilishqa chaqirip, xitayning maqullimaqchi bolghan dölet xewpsizliki qanuni xongkongda éghir muqimsizliq peyda qilidighanliqini bildürdi.

Amérika tashqi ishlar ministirliqining bayanatchisi morgan ortagus 21-may küni élan qilghan bayanatida mundaq dégen: "Xongkong xelqining arzusini eks-ettürmigen herqandaq dölet xewpsizliki qanuni éghir muqimsizliq peyda qilidu shundaqla amérika we xelq'ara jama'etning küchlük eyiblishige uchraydu."

Morgan ortagus xanimning tekitlishiche, xitayning bayanati we uning qanun layihesi xitayning 1997-yili xongkongni ötküzüwalghanda bergen wedilirige xilap iken. Ortagus xanim xitay hökümitini 1984-yili imzalan'ghan "Engiliye-xitay qoshma axbarati" da üstige alghan mejburiyetlirige emel qilishqa, xongkong xelqining öz-özini bashqurush arzusi, kishilik hoquqi we démokratik heqlirige hörmet qilishqa chaqirghan. 21-May küni yene prézidént tramp amérikaning bu qanun'gha küchlük inkas qayturidighanliqini bildürgen.

U muxbirlarning bu heqtiki so'allirigha jawab bérip: "Men uning qandaq qanun ikenlikini bilmeymen. Héchkim uni körüp baqmidi. Eger u maqullansa biz uninggha intayin küchlük inkas qayturimiz," dégen. Nöwette mezkur qanun layihesi Uyghur, tibet we bashqa kishilik hoquq teshkilatliriningmu qattiq qarshiliqigha uchrighan. Dunya Uyghur qurultiyi 22-may bayanat élan qilip, "Xongkong xelqining aptonomiye, kishilik hoquq we erkinlikining ularning köz aldida buzghunchiliqqa uchrawatqanliqi, eger tedbir élinmisa xongkongning sherqiy türkistan we tibet bilen oxshash aqiwetke qalidighanliqi" ni bildürgen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet