Xitay amérikaning xongkong toghrisidiki qararidin öch alidighanliqini bildürdi

Muxbirimiz erkin
2020-06-01
Share

Xitay tashqi ishlar ministirliqi 1-iyun küni amérikaning ötken jüme küni élan qilghan xongkong mesilisi we xitay oqughuchilar wizisi toghrisidiki qararigha inkas bildürüp, uningdin öch alidighanliqini bildürgen.

Xitay tashqi ishlar ministirliqining bayanatchisi jaw lijyenning tekitlishiche, amérikaning xitayning menpe'etige ziyan sélishi xitayning buninggha qarita taqabil turush tedbirlirini élishigha mejbur qilghan iken. Lékin u xitayning amérikagha qarshi qandaq taqabil turush tedbirlirini alidighanliqini éytmighan. Xitay xelq qurultiyi ötken hepte xongkonggha qaritilghan "Xitay dölet xewpsizliki qanuni" ni maqullighan idi.

Prézidént tramp ötken jüme küni bu qanunning xongkong xelqi üchün bir "Tragédiye" ikenliki, buning xongkongning amérika bilen bolghan soda, sayahet, jinayetchi almashturush jehetlerdiki imtiyazini bikar qilidighanliqini élan qilghan idi. Roytérs agéntliqining xewer qilishiche, jaw lijyen 1-iyun küni amérikaning qararigha qarshi turidighanliqini bildürüp: "Bu qarar xitayning ichki ishlirigha éghir derijide arilashqanliq. Bu amérika-xitay munasiwitini buzup, her ikki terepke ziyan salidu… amérikaning xitayning menpe'etige ziyan salidighan herqandaq söz-herkiti xitayning keskin qayturma hujumigha uchraydu," dégen.

Prézidént tramp ötken jüme küni xitayning "Yaman gherizi" dunya miqyasida keng kölemlik azab-oqubet we iqtisadi ziyan keltürüp chiqarghanliqini bildürgen shundaqla xongkongning erkinlikige buzghunchiliq qilghan xitay emeldarlirigha qarita émbargo yürgüzidighanliqini élan qilghan. Lékin u xongkonggha alaqidar qararlirini qachan ijra qilishqa bashlaydighanliqi we kimlerge émbargo yürgüzidighanliqini éytmighan idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet