Xongkong xelqi nechche on ming kishilik namayish ötküzüp, béyjing hökümitige naraziliq bildürdi

Muxbirimiz erkin
2016-07-01
Share

Xongkong xelqi 1‏-iyul xongkongning xitaygha qayturup bérilgenlikining 19 yilliq xatire küni nechche on ming kishilik namayish ötküzüp, béyjing hökümitige naraziliq bildürdi. Namayishchilar béyjing da'irilirining chégra atlap adem tutush herikitige qarshi yézilghan lozunkilarni kötürüp, béyjing hökümitini türmidiki öktichilerni qoyup bérishke, xongkong walisi lyang jényingni istépa bérishke chaqirdi.

Xongkong öktichi parlamént ezasi xu shyulen roytérs agéntliqigha bergen bayanatida, xitayning chégra atlap adem tutush herikitini tenqidlep, "Namelum küchlerning xelqni teqib qilishi, xongkong puqralirining amanliqi üchün zor tehdit" dégen.

Xitay amanliq küchliri ötken yili chégra atlap, xongkong "Tongliwen kitabxanisi" ning 5 neper xadimini tutqun qilghan. Uning bu herikiti xongkong we xelq'arada xongkong edliye musteqilliqi, xitayning "Bir dölet ikki xil tüzüm" wedisige éghir buzghunchiliq, dep qaralghan.

Xitay amanliq küchliri ötken yili chégra atlap tutup kétip, 8 ay solap qoyghan kitabchilarning biri li rongji bixeterlik sewebidin 1‏-iyul namayishigha qatnashmighan. U ilgiri namayishqa qatnishidighanliqini jakarlighan idi.

Bu namayishni uyushturghan pa'aliyetchilerning biri law shenching, "Li rongji jiddiy tehditke uchridi we namayishqa qatnashmasliqqa mejbur boldi" dégen.

Li rongji xitayda 8 ay tutup turulup yéqinda qoyup bérilgen. U xongkonggha qaytip kélip, xitay saqchilirining özini qanunsiz görüge tutqanliqini we özige tehdit salghanliqini élan qilghan idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet